Цæгат Ирыстоны фæллойады ахастдзинæдтæ сты нывылгонд, къабазы уавæрмæ ис æмбæлгæ цæстдард. Уый тыххæй регионы разамонæг Сергей Меняйло фехъусын кодта Уæрæсейы фæллойадон базарад сног кæныны фæдыл ведомствоты ‘хсæн кусæг къорды æмбырды. Амыдта йæ бæстæйы хицауады сæрдары хæдивæг Татьяна Голикова.
Видеобастдзинады руаджы ма дзы архайдта вице-премьер Платы Альбинæ æмæ бæрнон кусджытæ. Сергей Меняйло куыд радзырдта, афтæмæй кæд 2020-æм азы æгуыст адæмы нымæц уыд 15%, уæд ныртæккæ та сты 9%. Уыимæ ма рæзынц хæдбарӕй кусджытæ дæр. Ныртæккæ сты 38 мин адæймагæй фылдæр. Ноджы ма ног куысты бынæттæ раттын у инвестицион проекттæ æххæст кæныны хъуыддаджы сæйрагдæр æууæл. Республикæйы кусынц 41 инвестпроектыл. Сæ иумæйаг аргъ у 66 млрд сомы. Сæ райрæзты руаджы республикæйы фæзындзæн 8 мин куысты бынаты.
Цæгат Ирыстоны æнтыстджынæй æххæстгонд цæуы национ проект “Демографи”-йы федералон проект “Содействие занятости”. 2020-æм азæй нырмæ йæ архайджытæ систы 2 723 адæймаджы, уыдонæй 85% куысты бынæттæ ссардтой. Профессионалон цæттæдзинады программæтæй парахатдæр сты гид-экскурсовод, туризмы инструктор, хæринаггæнæг æмæ æндæртæ. Фæллой æмæ социалон рæзты министрад æххæст кæны социалон контрактты программæ. Йæ архайджытæ — æххуысцух адæм. Æртæ азмæ йæ фæлгæты куысты бынæттæм райстой мин адæймаджы, ноджы ма мин æмæ æрдæгæй фылдæр та систы амалхъомтæ.
Сергей Меняйло радзырдта ахуырадон уагдæттæ æмæ промышленон куыстуæтты æмгуыстады тыххæй. Афтæ, фæстаг цалдæр азы æнтыстджын æмгуыст кæнынц нæ бæстæйы цалцæггæнæн-арæзтадон куыстуат “Норникель” æмæ нæ республикæйы уæлдæр ахуырадон уагдæттæ. Практикæйы фæстæ ацы компаниты баззадысты 2 700 рауагъдонæй фылдæр.
