Цæгат Ирыстоны сæргълæууæджы хæстæ рæстæгмæ æххæстгæнæг Сергей Меняйло фембæлд Алайнаг æмæ Дзæуджыхъæуыккаг алчыр Леонидимæ.
Æрдзырдтой Аланийы аргъуыды 1100 азы сæххæсты бæрæгбонмæ бацæттæ кæныныл. Паддзахадон æмвæзадыл аргъуыды бон сбæрæг кæныны уынаффæ нæ бæстæйы президент Владимир Путин рахаста 2017 азы. Кадджын мадзæлттæ ацæудзысты 2022 азы. Бæрæгбонмæ саккаг кæндзысты уӕлуац патриарх Мӕсгуыйаг ӕмӕ Уырысы армдар Кирилл. Уыимæ ма, æппæт Уæрæсейæ иумæ фæсарæнтæй уазджытæ.
Программæйы фæлгæты бацæттæ кæндзысты культурон æмæ спортивон мадзæлттæ, музейты æмæ равдыстыты проекттæ. Фæнысан ма кодтой аргъуантæ æмæ, егъау уырнынадон-культурон ахадындзинад кæмæн ис, уыцы объекттæм базилын æмæ сцалцæг кæныныл.
