Цæгат Ирыстоны сæргълæууæг Сергей Меняйло фембæлд скъоладзауты ныййарджытимæ, цæмæй сæ сывæллæттæм хуыздæр кæсой æмæ сæ алыхуызон æнæзакъон иугæндты идеологийы фæдыл цæуын ма уадзой. Æмбырды ма архайдтой республикæйы сæргълæууæг æмæ хицауады администрацийы разамонæг Гобеты Ибрагим, ахуырад æмæ наукæйы министр Алыбегты Эллæ, æхсæнадон æдасдзинад хъахъхъæнæг пъæлицæйы хайады разамонæг Агънаты Уырызмæг. Дзырдтой, æрæджы барадхъахъхъæнджытæ Дзæуджыхъæуы дæсгай æрыгон адæймæгты кæй баурæдтой, ууыл. Рæзгæ фæлтæр фæцалх мæнг идеологийыл, сæ хъуыдытæ сын сзыгъуыммæ кодтой социалон хызты. Цалдæр бонмæ иугонды сыфыл йæхи чи бафыста, уыдон æгас Уæрæсейы баисты мингæйттæ. Се `хсæн разындысты нæ республикæйы минæвæрттæ дæр. Сергей Меняйлойы ныхæстæм гæсгæ, сывæллæттæм сидынц уынгтæм рацæуынмæ æмæ барадхалæн митæ кæнынмæ.
Республикæйы сæргълæууæг куыд загъта, афтæмæй уыцы худинаджы ми ма `руадзыны хæсы фылдæр бæрнондзинад ис ныййарджыты къухы. Афтæ сæм куы кæса, æмæ сæ сывæллонæй хуыздæр нæй æмæ ахæм митæ никуы ракæндзæн, уæддæр ын рæстæгæй-рæстæгмæ хъæуы йæ телефон сгарын, цæмæ дзы кæсы, уый фенын. Хъуамæ йын зоной йæ хæлæртты, стæй цавæр æхсæнадтæм здахы йе `ргом социалон хызты, уый дæр. Ныййарджыты хъæуы æргомæй дзурын сæ сывæллæттимæ, цæмæй сын бамбарын кæной ахæм æнæсæрфат миты фæстиуджытæ. Бæрæг куыд у, афтæмæй иу хатт фæцудгæйæ рæстуд цардмæ раздæхын зын вæййы. Сергей Меняйлоимæ фембæлды размæ ма ацы фарсты фæдыл уыдис сæрмагонд æмбырд. Сæ ныхасы сæр уыдонæн дæр уыд фæсивæды æнæрхъуыды митæй бахизыныл кусын. Æмбырды ма архайдтой республикæйы разамынды æмæ æхсæнады минæвæрттæ.
