Сæрмагонд æфсæддон операцийы архайджытæн æмæ сæ бинонтæн социалон æххуыс, паддзахадон программæтæ æмæ нацпроекттæ, ахуырад æмæ æндæр ахсджиаг къабæзтæ. Цæгат Ирыстоны сæргълæууæг Сергей Меняйло раныхас кодта æрвылазон докладимæ. Радзырдта регионы социалон-экономикон рæзт æмæ ивгъуыд азы хатдзæгты тыххæй. Хицауады куысты тыххæй æмæ фидæнмæ нысантæ нæ дарддæры æрмæджы.
Сæйрагдæр – цы фарстатæ æмæ уынаффæтæ æххæстгонд цæуынц дунейы уавæрыл æнцайгæйæ. Регионы разамонæг уый тыххæй фæнысан кодта раныхасы райдиан. Уæрæсе скуынæг кæныныл чи архайы, уыдонӕн дзы ницы рауайдзӕн. Йӕ доклады Сергей Меняйло радзырдта сæрмагонд æфсæддон операцийы тыххæй. Чи дзы архайы уыцы æфсæддонтæн æмæ бархионтæн, уыимæ сæ бинонтæн æххуыс хъуамæ уа фыццаградон.
Бархион батальонты фæзынд æмæ архайдмæ кæсгæйæ, бæстæйы экономикæ рохуаты нæ фæци. Уый нæ, фæлæ ма регион равдыста хорз бæрæггæнæнтæ ахсджиагдæр къабæзты. Республикæйы рæзы чысыл æмæ рæстæмбис амалхъомады чи архайы, уыдоны нымæц. Фарон бæрц уыд 43 млрд сомы чысыл цухæй.
Экономикæйы рæзт баст у туризмы къабазимæ. Доклады уый тыххæй фехъусæн уыд бæстон æмæ бирæвæрсыг мадзæлттæ. Дзæуджыхъæуы фæзындзысты комкоммæ авиарейсытæ Уфайæ, Иркутскæй æмæ Новосибирскæй. Уый фидæны, ивгъуыд азы та хицауады уæнгтæ рахæцыдысты 16 æхсæнадон хъæппæрисы фарс. Грантты бæрц субсидиты хуызы рауад 130 милуан сомæй фылдæр.
Адæмы царды уавæртæ хъæуы хуыздæр кæнын. Хицауадæй бирæ аразгæ у. Хатгай сæ куыстмæ бахæссын фæхъæуы ногдзинæдтæ. Регионы фидæн та у фæсивæд – курдитаджын æмæ суинаг æрыгон фæлтæр. Уыдонæй аразгæ уыдзæн фидæны Цæгат Ирыстоны райрæзт.
Ивгъуыд азы нæ спортментæ равдыстой хорз бæрæггæнæнтæ. Алыхуызон ерысты рамбылдтой 951 хæрзиуæджы. Уыдонæй 110 майданы сты йе ‘нæнинздзинад цудыд кæмæн у, ахæм спортсментæ. Культурæмæ рахизæм. Культурон нысаниуæг кæмæн ис, уыдонæй 80% бæстыхайы сты заууат уавæры. Сæ бахъахъхъæныныл бакусын у сæйраг хæс. Сæргълæууæджы раныхас цыд сахатæй фылдæр. Дзуапдæттæг министртæн æмæ специалисттæн Сергей Меняйло бабар кодта размæвæрд фарстатыл дысвæлдæхтæй бакусын.
