Сергей Меняйло сарæзта æрвылкъуырион аппаратон æмбырд

Цæгат Ирыстоны карантины сæхгæдтой 1 скъола, 13 къласы æмæ 13 рæвдауæндоны.  Вирусон низтæй рынчынты нымæц ахуыргæнæндæтты у 14%, скъолайы агъоммæ кусæндæтты та — 15%. Уый тыххæй аппаратон æмбырды фехъусын кодта профилон министр Алыбегты Эллæ. Уæрæсейы фæлхасгæнджытæм цæстдарды управленийы бæрæггæнæнтæм гæсгæ, æхснырсæгимæ дохтыры æххуыс чи бацагуры, уыдоны нымæцыл ивгъуыд къуыри бафтыд. Сæ фылдæр сты сывæллæттæ. Лабораториты ныртæккæ грипп арæхдæр рабæрæг кæнынц. Коронавирусæй рынчынтыл нысангонд æмгъуыдмæ бафтыд 10 адæймаджы. Ныхас цыд уæзласæн хæдтулгæтыл дæр. Электронон рады ис автотранспорты 2 157 иуæджы. Сергей Меняйло республикæйы Æнæнхъæлæджы уавæрты министрад æмæ профилон ведомствæтæн бабар кодта Хуссар Ирыстон æмæ Гуырдзыстонимæ æмгуыст кæнын, цæмæй уадзæн пункттæ боныхъæды аххосæй куы ‘хгæной, уæд информаци афойнадыл хæццæ кæна цæрджытæм. Сæргълæууæг ма бабар кодта электрон тыхæй ифтонгады хæрзхъæддзинадмæ æркæсын. Ивгъуыд къуыри йæ ахуыссын кодтой 14 хатты. Аххосæгтæ рабæрæг кæнын хъæуы, — загъта сæргълæууæг.