Уæрæсейы мыхуыры бон Дзæуджыхъæуы фæнысан кодтой республикæйы хуыздæр журналистты. Се ‘нтыстджын архайды тыххæй сæргълæууæджы номæй æрвылазон преми райстой 25 адæймаджы – республикæйы дзыллон информацион фæрæзты минæвæрттæ. Уыдонимæ нæ телекомпанийы кусджытæ. Æлборты Алисæйы хуыздæрыл банымадтой «Кад æмæ намыс», зæгъгæ, номинацийы. Номинаци «Афæдзы темæ Уæрæсейы – бæстæйы адæмты культурон хæзнаты афæдз»-ы та сæргълæууæджы преми райста Зыхъуаты Жаннæ.
Моргуаты Ладæйы æмæ Махъоты Мæдинæйы фæнысан кодтой куыд хуыздæрты афтæ, номинаци «Фидæн»-ы. Æма ма иу номинаци «Проба пера», зæгъгæ, сфæлдыстады фыццаг æнтыстджын къахдзæфтæ чи акодта, уыдонæн. Хуыздæрыл банымадтой Хъесаты Эллинæйы. Журналисттæн ма фадат уыд республикæйы сæргълæууæгимæ аныхас кæнын. Радтой йæм фæрстытæ, æрдзырдтой Цæгат Ирыстоны журналистикæйы райрæзтыл. Сергей Меняйло фæнысан кодта, кæд рæстæг тагъд ивы, уæддæр зонгæ классикон информацион фæрæзтæ кæддæриддæр уыдзысты актуалон. Уыдон хъæуы æмдыхæй хъахъхъæнын æмæ сæ райрæзтыл архайын.
