Ретро, дунейы, уыимæ нырыккон зарджытæ ныр фехъусæн ис ирон æвзагыл. Ахæм ирд эксперементты национ телеуынынад нæма архайдта. Егъау сфæлдыстадон командæ нæ телуынынадмæ кæсджытæн бацæттæ кодта уæрæсейаг æмæ фæсарæйнаг зарджыты концерт. Цæттæ йæ кодтой мæйы дæргъы.
Ацы зындгонд зарæг тæлмац кодтой дæсгай хатты. Хъуыстам æм французаг, немыцаг æмæ ма суанг испайнаг æвзагыл дæр. Фæлæ, чи уыд æнхъæл æмæ Билли Айлишы зарæг ирон æвзагыл дæр кæй айзæлдзæн.
«Bad Guys», «Chery Chery Lady», «Нежность» æмæ ма ноджы 12 зарæджы мадæлон, ирон æвзагыл. Сæйрагдæр уыд ритмикæ æрцахсын, уыимæ зарæджы мидис раст ратæлмац кæнын. Æрмæст афтæмæй зарæг рауайы зæрдæмæдзæугæ, уæдæ йыл музыкант дæр æнцонæй бакусы. Тæлмацгæнджыты ныхæстæм гæсгæ, архайдтой алы тексты дæр сæ уды хъарм бавæрыныл.
Нæ телеуынынадæн ахæм проект у фыццаг. Тæлмацгонд зарджыты ‘хсæн куыд нæуæдзæм азты хиттæ, афтæ нырыккон зарджытæ дæр. Уыимæ ма хицæн музыкалон клиптимæ, ирд уæлæдарæс æмæ, сæйрагдæр та курдиатджын зарæггæнджытæ.
Æрыгон зарæггæнæг æмæ продюсер Мадина Тоголокова тæлмац кодта нырыккон зарæггæнджытæ Хамали æмæ Наваийы «Птичка». Уæд æй чызг нæма зыдта фæстæдæр æй йæхæдæг кæй азардзæн.
Зындгонд æмæ алкæмæн дæр уарзон зарæг «Нежность» та азарыд Гæбуты Жаннæ. Ратæлмац æй кодта республикæйы адæмон поэт Кокайты Тотрадз. Сæттынц, ам зындæр кæй уыд сæйраг дзырд «Нежность» ратæлмац кæнын. Фæстæдæр ын æрхъуыды кодтой «Цинузæлд». Адæмон артисткæйы ныхæстæм гæсгæ, Анна Германы фæлгонц сфæлдисын уыд æнцон.
Тыхджын сылгоймаджы зарæг. Афтæ хонынц Глория Гейноры зындгонд композици «Я выживу», зæгъгæ. Азарыд æй Баскаты Зæлинæ.
Дунейы зындгоддæр зарджытæ иронау. Телеканал «Осетия-Ирыстон» ацы сфæлдыстадон проектыл архадтой мæйы бæрц. Концерт цы егъау къорд цæттæ кодтой, уыдон сæ зæрдæ дарынц, нæ телеуынынадмæ кæсджытæ аккаг аргъ кæй скæндзысты.
Калоты Дзерассæ
