Иу скъола æмæ сывæллæтты рæвдауæндæтты 8 хицæн къорды сæхгæдтой карантины. Æхснырсæгæй рынчынты нымæц нысангонд эпидемиологон бæрæггæнæнæй у бæрзонддæр. Фæлæ уавæр тæссаг нæу.
Грипп республикæйы нæ раиртæстой. Ивгъуыд къуыри коронавирус рабæрæг 49 адæймагмæ. Уый тыххæй фехъусын кодтой аппаратон æмбырды. Амыдта йæ Сергей Меняйло.
Дзуапдæттæг министр Тебиаты Сослан куыд радзырдта, афтæмæй афæдзы кæронмæ фæзындзæн ноджы дыууæ афтечы пункты, абон республикæйы сты 82. Тагъд æххуысы медицинон къордтæн уæлæмхасæн хуызы самал кодтой медицинон ифтонггæрзтæ — 25 дефибрилляторы æмæ туаггуыры 70 редукторы. Афæдзы райдианæй рафыстой 189 мин рецепты.
Æрдзырдтой æндæр темæтыл дæр. Цæгат Ирыстоны скæсæйнаг-каказаг дзæбидыртæ парахат кæнынц. Сергей Меняйло профилон ведомствойæн бабар кодта æрдзон æвæрæнты министрадмæ æмбæлгæ гæххæттытæ арвитын, цæмæй дзæбидыртыл рæстæгмæ цуан кæнын мауал уадзой.
Ноджы ма иу амынддзинад — Нузалы аргъуан бахъахъхъæныны фæдыл мадзæлттæ саразын, æрмæст уый фæстæ йæ рацаразын. Бæрнон специалисттæ уый фæдыл цæттæ кæнынц æмбæлгæ гæххæттытæ. Арвыкомы фæндаг æмæ Транскам гом сты хæдтулгæты æппæт хуызтæн дæр. Республикæйы фæндæгтыл æрæмбырд 1815 уæзласæн хæдтулгæйы. Сергей Меняйло бæрнон ведомствотæн бахæс кодта уæзласæн хæдтулгæты змæлды фæдыл куыст снывыл кæнын.
