Фæндаггон фыдбылызæй хи бахизынæн ахсджиаг у алы лыстæгдзинад дæр. Суанг ма къухтæ рулыл куыд дарай, уый дæр. Сæрмагонд скъолайы сæ мæнæ ацы тренажерыл ахуыр кæнынц хæдтулгæ скъæрын. Инструктор æмбарын кæны: æнцондæр уыдзæн рульмæ нымæцуаты хуызæн куы кæсай, уæд. Галиу къух хъæуы фарасты æмвæзадыл æрæвæрын. Рахиз та дыууæйы. Бынмæ къæхтæм æмæ ахæцæнтæм кæсæн нæй. Хи сахуыр кæнын хъæуы æрмæст фæндагмæ кæсын. Къухтæ хъуамæ къæхтæй цырддæр кусой. Ахуыр кæнын æрæджы чи райдыдта, уыдонæн зындæр вæййы. Инструктортæ архайынц, цæмæй сæ ахуыргæнинæгтæ шофыры æвдисæндартæ æнцонæй райсой, ахуыртæм та зæрдæргъæвæдæй цæуой.
Сидахъаты Фатимæйы фæндаггон змæлды домæнтæ сагъæсы дардтой. Афтæ йæм каст æмæ нысæнттæ, амынддзинæдтæ, хæдтулгæ куыд арæзт уый нæ бахъуыды кæндзæн. Фæлæ сылгоймаг куыд зæгъы, афтæмæй хъуыддаг æнцондæр рауад. Теорийы ахуыртæ райдайынц видеоурокæй. Темæ лыстæг равзарынц, уый фæстæ иумæйагæй баххæст кæнынц тест. Дарддæр та хибарæй куыст. Паддзахадон автоинспекцийы экзаменæн уый йæ фæлварæн хуыз у.
Авто скъола бадомы сæрмагонд гæххæттыты хыгъд. Раттын хъæуы медицинон справкæ, пасторты къопи, фыццæгæм апрелæй та домынц СНИЛС-ы дубликат. Æнæ уымæй ныр фæлварæн раттынмæ нæ уадзынц, бардæттæг гæххæттытæ дæр нæ дæттынц. Инструктортæ куыд зæгъынц, афтæмæй ахуырты рæстæг хъæуы бабыхсын.
Сæрмагонд скъолайы кæд рæдыдæн бынат ис, уæд сæ фæндаг та нæ хатыр кæны. Инструктортæ æппынæдзух амонынц фидæны шофыртæн сæ æнарæхстдзинад цы уæззау фæстиуджытæм расайдзæн, уый. Уымæ гæсгæ ахуырдзаутæ ацæуынц практикон ахуыртæ. Бонæй-бонмæ сæ арæхстдзинадыл автотромы кусынц. Уый сын хорз æххуыс у горæты уынгтæ æмæ хæдтулгæ æнкъарынæн.
Таухъазахты Азæйы дæр куыд иннæ кандидатты, афтæ практикон ахуыртæм бауагътой æрмæст фæндаггон фæткы иумæйаг домæнтæй фæлварæн раттыны фæстæ. Практикæимæ уыцы-иу рæстæг ахуыр кæны теори дæр. Ахуыргæнинагимæ æппынæдзух ис фæлтæрдджын инструктор. Уый йын амоны алы лыстæгдзинад дæр. Сæйраг дæр та лæмбынæг уæвын. Къæхтæ хъуамæ уой ахæцæнтыл, уæлæмхасæнтæ ис алы ахуырадон хæдтулгæйы дæр.
Автоскъолайы курс арæзт у дыууæ хайæ, теори æмæ практикæ. Ардæм æрмæст фæндаггон змæлды фæтк ахуыр кæнын кæнæ хæдтулгæ скъæрын нæ хауынц. Ахуыр ма кæнынц фыццаг медицинон æххуыс бакæныныл дæр. Уымæй уæлдай ма, хæдтулгæ скъæрынмæ йæ ныфс чи нæ хæссы, уымæн йæ бон у психологы æххуыс райсын. Бирæ ахуыргæнинæгтæ тæрсынц фæндаггон фыдбылызтæй. Æдзæттæ адæймагмæ хæдтулгæ дæттæн нæй, зæгъы инструктор Бекмæрзты Юрий. Ахсджиаг у куыд æмбæлы, афтæ йæ бацæттæ кæнын. Хæдтулгæ скъæрыны размæ хъæуы бæстон ныхас.
Ахуырты фæтк æнцонвадат у. Хæдтулгæ скъæрын ахуыр кæнынц райсомæй, боныгон æмæ изæрæй, суанг ма фæлладуадзæн бонты дæр. Зæгъæм, Рахизфарсы районы цы скъола ис, уым ахуыртæ цæуынц къуыри фондз хатты. Сæ аргъ у 30 мин сомæй фылдæр. Бафидæн æй ис хæйттæй кæнæ та мадæлты капиталы ‘руаджы. Официалон æгъауæй чи кусы, уыдонæн та сæ бон у сæ æхцайы 13% фæстæмæ раздахын.
Ахæм та у Паддзахадон автоинспекцийы фæлварæнты хайады теори кæм дæттынц, уый. Инспектор аразы инструктаж. 1-æм апрелæй — ног æгъдæуттæ. Æртæ хатты фæлварæн куы нæ радтай, уæд æй ногæй радтæн уыдзæн æрмæст афæдзы æрдæгы фæстæ. Раздæр та цыппæрæм хатт фæлварæн раттæн уыд мæйы фæстæ. Туаты Ларисæ теори дæтты фыццаг хатт.
Арæх теори дæттыны рæстæг фæрæдийынц лæмбынæг кæй не ‘ркæсынц хæслæвæрдмæ, уый тыххæй. Алы лыстæгдзинадмæ дæр хъæуы бæстонæй æркæсын. Билеты — дыууын минутмæ дыууын фарсты. Иу хайы куы фæрæдийай, уæд ма баххæст кæнын фæхъæуы ноджы 5 уæлæмхасæн фарсты. Дыууæйы — дæс. Фылдæр рæдыдтытæ куы æруадзай, уæд фæлварæн нæ ацыдта. Агъуысты ис видеоцæстдарды системæ. Æххуысы мадзæлттæй пайда кæнæн нæй.
Рог хæдтулгæ скърынæн бар дæтты В категорийы æвдисæндар. Практикон фæлварæны фæстæ йæ райсынц 30 боны фæстæ. Бафидын ма хъæуы паддзахадон фиддон 2 мин сомы. Паддзахадон автоинспекцийы куыд зæгъынц, афтæмæй теори æмæ практикæ фыццаг хаттæн раттæн ис.
