Олимпаг чемпионтимæ фембæлд. Зындгонд богæлттæ республикæйы районты сывæллæттæн сарæзтой дæсныйадæвдисæн ахуыртæ. Се ‘хсæн Сидахъаты Зауырбег, афтæмæй. Спорты йæ ном сыгъзæрин дамгътæй фыст кæмæн æрцыд, уыимæ фембæлд фæсивæд стыр лæварыл банымадтой. Уæлдайдæр та, уæгъдибар хъæбысхæсты хи бафæлварын кæй фæнды, уыдон.Тренировкæты уыд не сфæлдыстадон къорд дæр.
Сывæллæттæ лæмбынæг кæсынц спортсменты алы фезмæлдмæ дæр. Уыдон дæр сын, хистӕрты бынаты уӕвгӕйӕ, спорты архайды сусæгдзинæдтæ æргом кæнынц. Фæсивæд сæхиуыл нæ ауæрдынц. Архайынц сæ арæхстдзинад равдисыныл. Ахæм тренировкæйы бацархайыны фадат алы хатт нæ вӕййы. Рагæй йæм æнхъæлмæ кастысты.
Зындгонд богæлттæ фæсивæдæн дæсныйадæвдисæн ахуыртæ фыццаг хатт нæ аразынц. Тренировкæтæ сыл хорзы ‘рдæм ахадынц.
Уый спортсментæ сæхæдæг дæр бафиппайдтой. Олимпаг хъæзтыты чемпион Сидахъаты Зауырбегæн ныр дæр ма йæ зæрдæйыл лæууы, йæхæдæг дæр-иу номдзыд спортсментимæ фæмбæлдмæ куыд зæрдиагæй æнхъæлмæ каст, уый. Ныр дӕр суинаг спортсменты цæхæр цæстытæм кæсгæйæ ныфс ис, уӕлахиздзауты дæнцæг сын, спорты фæндæгтыл цæугæйæ, æххуыс кæй уыдзæн.
Мадзал сарæзтой спорты æппæтдунеон боны фæлгæты. Расидтысты йæ республикæйы фæллойы, стӕй физкультурæ æмæ спорты министрадты хъæппæрисæй. Мадзалы сæйраг нысан — фæсивæды ‘хсæн æнæниз царды уаг парахат кæнын.
Тренировкæйы фæстæ ма сывæллæттæ бирæ рæстæг сæ уазджыты нӕ уӕгъд кодтой, фæндараст зæгъынмæ сын нæ тагъд кодтой. Фæндыд сæ спортсментимæ къам сисын, сæ архайды тыххæй сусæгдзинæдты тыххæй фехъусын. Фембæлды фæстæ сывæллæттæй бирæты бафæндыд сæхи ацы спорты хуызы бафæлварын.
