Фӕстаг гол ам бакъуырдтой ковиды размӕ, трибунӕтӕ та ӕнхъӕлмӕ кӕсгӕйӕ лæууыдысты бирӕ — 5 азы ӕмӕ ӕрдӕг. Фæлæ ныр ноггонд “Спартак”-ы фæзынд уддзæф — фарсхӕцджытӕ раздӕр куыд тагъд кодтой къордгӕйттӕй стадионмӕ, афтæ абон дæр.
Пищевик — Водоканал. Ацы хъазт у фыццаг стыр матчы репетици. Командӕтӕ фӕлварынц ног фæз, сбӕрӕг кӕндзысты дарæс ивыны агъуыстыты ӕнцонвадат, трибунӕтӕ та фидардзинадæй бавзардзысты фарсхӕцджытӕ сӕхӕдӕг – абоны фембӕлдмӕ билеттӕ – лӕвар.
Фæзы иннӕ фарс – ӕнхъӕлмӕгӕсджытӕ къаддӕр не сты. Черчесты Инал Спартакмӕ рацыд, Аланийы хъазӕг ма куы уыд, уӕд. Ныр афӕдзы ‘рдӕг хъахъхъӕны Беслӕны Пищевикы хуызтӕ. Командӕйы фӕндаг кӕронбӕттӕнмӕ æнцон нæ уыд — Хъӕдгӕрон, Цхинвал ӕмӕ Фыййагдон. Ӕнкъарӕнтӕ, фыццаг хатт куыд уыд, афтӕ.
Ӕхсызгон у абоны матч коммунальщикты командӕйы дӕр, уӕлахизыл ам сӕ зӕрдӕ къаддӕр нӕ дарынц. Фарон спортсментӕ, рагӕй кӕмӕ ӕнхъӕлмӕ кастысты, уыцы трофей сӕхимӕ аластой, ныр та бацархайдзысты уӕлахиз сфидар кӕныныл. Беслӕны æмцæдисонтимæ фæз адих кӕныны размӕ Водоканал зын матчтӕ ахъазыд Джызӕлы ӕмӕ Дигорайы иугонд командӕтимӕ.
Дулаты Артурӕн фыццаг матч у ахæм стыр стадионы. Йӕ фæндаг райдыдта Аланийы академийы, уырдӕм ӕй ӕрбакодта йӕ фыд — раздæры футболист. Куыд сӕдӕгай ӕндӕр хъомылгӕнинӕгтӕм, афтӕ Артурмӕ дӕр уыд иу бӕллиц хъуыстгонд “Спартак”-ы ахъазын.
Кӕд командӕты традицион хуызтӕ цъӕх ӕмӕ урс сты, уӕддӕр трибунӕтӕ раст хъулон дарынц сырх-бурӕй. Абоны фембӕлд у чысыл бӕрӕгбон ӕппӕт республикӕйӕн, фарсхӕцджытӕ стыр футболмӕ ӕнхъӕлмӕ кӕсынц, æмæ сæ бирæ лæууын нал хъæуы.
Командæ уӕлдӕр дивизионмӕ йæ фæндаг ныр райдыдта. 16-ӕм августы, Алани фыццаг хатт рацӕудзӕн йӕ райгуырӕн фæзмæ. Дзӕуджыхъӕуккӕгтӕ райсдзысты Динамойы Кировӕй, фембӕлд зӕрдӕ ӕвӕры ирд рауайынæй.
