Сывæллæтты хæдзар “Хуры тын”-ы ацыд профилактикон акци, йæ сæргонд “Ирыстоны фæсивæд æнæниз цардыуаджы фарс”, зæгъгæ. Мадзал расидтысты хæрзаудæн фонд “Ирвæзынгæнæн зиллакк”-ы. Рæзгæ фæлтæрæн равдыстой зианхæссæг буаргъæдты знаггады тыххæй видео. “Æдас” æмæ “сыгъдæг” цы наркотиктæ хонынц, уыдон дæр цард æмæ æнæниздзинадæн тæссаг кæй сты.
Экранæй лæппутæ æмæ чызджытæм фæсидтысты наркотиктæ сæ цард кæмæн фехæлдтой, ахæм адæймæгтæ, семæ иумæ — зындгонд спортсментæ. Ахæм дæнцæг сывæллоны зондахастыл хъуамæ хорзырдæм сахада,— зæгъы фонды сæрдар Дзгойты Геннадий. “Хуры тын”-мæ уазæгуаты æрбацыдысты æхсæнадон архайджытæ æмæ чемпионты тренертæ. Уыдон фæсивæды лæвар тренировкæ кæнынмæ сты цæттæ.
Сывæллæтты хæдзарæн балæвар кодтой чингуытæ, хызынтæ, адджинæгтæ. Ахæм фембæлдтытæ “Ирвæзынгæнæн зиллакк” аразы ныр 15 азæй фылдæр, æмæ æрмæст Дзуджыхъæуы нæ ацæуынц, фæлæ районты дæр. Дзгойты Геннадиимæ фæсивæдмæ æрбацæуынц дæнцæг исын сæ бон кæмæй у, ахæм хистæртæ.
