Хӕдзармӕ ӕрыздӕхын кӕстӕр сержант Цхуырбаты Зауырбегӕн ссис тӕккӕ зындæр тох. Уӕззау цӕф аивта ӕппӕт дӕр. Сабыр цард ын цыма æцӕгӕлон сси, æнахуыр. Зауырбеджы хъуыдис ног тыхтæ ссарын, цӕмӕй йæ къæхтыл ногæй слæууыдаид.
Службйы размӕ Зауырбег архайдта армрестлингæй. Фыццаг ерыстӕ цӕфы фӕстӕ уыдысты ӕрмӕст тыхтӕ бӕрӕггӕнӕг. Фӕлӕ ӕфсӕн удыхъӕд йæхи равдыста. Уæлахизтæм æнхъæлмæ кæсын бирæ нæ бахъуыд. Абон Зауырбег у Уæрæсейы чемпион. Рамбылдта бӕстӕйы ерысты сызгъæрин. Йæ алы уӕлахиз — удуӕлдай фыдæбоны хорзӕх.
Плиты Людмилӕйӕн йӕ фӕндаг бынтон ӕндӕрхуызон рауад. 9 мӕйы хӕстон архайды бынаты. Уый фӕстӕ йын зын уыд хуымӕтӕг цардыл сахуыр уӕвын. Баххуыс ын кодтой фонды социалон координатортæ. Сæ фӕрцы Людмилӕ йæхимæ ссардта тыхтæ ахуыр кӕнынæн ӕмӕ дӕсныйад райсынæн. Ныр ын ис ног нысан царды.
Тагъд Людмилӕ йӕ фыццаг тыллӕг сисдзæн. Йæ нысан — стыр ӕмӕ ахъаззаг. Хъуамæ йе ‘нтыст ныффидар кӕна æмæ йӕхи фермерон хӕдзарад сараза.
Елхъанты Сергей дӕр сфӕнд кодта ног фадӕттӕй спайда кӕнын. Сæрмагонд операцимæ ацыд фыццаг бонты. Куы ‘рбаздӕхт, уӕд разӕнгардӕй ахуыр кӕнын райдыдта. 2 азмӕ райста 4 ахуырады.
Ныр Сергей архайы стыр æмбырдты. Дзуры регионы ӕмӕ ӕппӕт бӕстӕйы ӕмвӕзадыл. Ноджы — спортивон ерыстæ. Арӕх ӕмбӕлы ӕмӕ ныхас кӕны фӕсивӕдимӕ. Хӕдзармӕ ӕрыздӕхыны фæстæ æппынæдзух ӕххуыс кӕны адӕмӕн ӕмӕ пайда хӕссы сабыр царды.
Ацы адӕмӕн сӕ хъысмӕттӕ алыхуызон сты, фӕлӕ се ‘нтыстытæ иухуызон æхсызгон. Сӕ бон бацис сӕхи ссарын. Ӕнтыстджынӕй райдыдтой ног, сабыр цард. Сæ историтæ систы Æппӕтуӕрӕсеон преми “Возвращение”-йы ахсджиаг хай. Ацы дӕнцӕгтӕ ӕххуыс сты иннӕ адӕмӕн дӕр сӕ хъарутыл баууӕндынӕн.
Преми иу кӕны алыхуызон къабӕзтӕ. Се ‘хсӕн ис спорт, культурӕ ӕмӕ ӕхсӕнадон куыст. Ноджы — бизнес ӕмӕ зондамонынад. Ӕдӕппӕтæй — 10 номинацийы. Цӕгат Ирыстоны ныридӕгӕн балӕвӕрдтой 17 курдиаты. Исдзысты сæ 31 августмӕ Уӕлахиздзауты равзардзӕн сӕрмагонд жюри. Уырдӕм хауынц Уӕрӕсейы Хъӕбатыртӕ, хӕстон архайды ветерантӕ ӕмӕ ӕхсӕнадон организациты раззагдӕртӕ.
