Цӕгат Ирыстоны дарддӕр аразынц фӕндаг Хохы Санибайӕ Хъӕрмӕдонмӕ

Цӕгат Ирыстоны дарддӕр аразынц фӕндаг Хохы Санибайӕ Хъӕрмӕдонмӕ. Куыстытӕ æххæст кӕнынц нацпроект “Инфраструктурӕ цӕрынӕн”-ы фӕлгӕты. Йӕ дӕргъ дыууӕ километры ӕмӕ ӕрдӕджы бӕрц кӕмӕн у, ахӕм зӕххы хайыл цæттæ кæнынц дыууӕ хиды ӕмӕ фидар кӕнынц хӕхты фӕхстӕ. Хъолайы цъити 2002-æм азы куы раивылд, уæд раздæры фæндаг фехæлд. Уæдæй цӕрджыты бынатмæ бахæццæ уæвыны тыххæй бахъӕуы Дайраны комыл ӕрзилын. Ныртӕккӕ специалисттӕ аразынц ахизæнтæ, сӕ дӕргъ у æвдай аст ӕмӕ æхсай метры. Уыцы иу рæстæг уæрæхдæр кæнынц фæндæгтæ, фӕхстӕ сыгъдӕг кӕнынц, лæбырдтæ æмæ дурзæйтæй бахъахъхъæнынæн аразынц сæрмагонд фæрæзтæ.