Алагиры скъола-интернаты бындурон цалцæг кæронмæ фæхæццæ кæны. Ноггонд уал æрцыд ахуырадон бæстыхай. Ивд æрцыдысты æппæт хæтæлтæ дæр. Сæйрагдæр у скъоладзаутæн æнцонвадат уавæртæ скæнын. Ныр уæрæх æмæ райдзаст кълæсты уыдзæн нырыккон ифтонггæрзтæ. Куыстыты цыд федтой ме ‘мкусджытæ. Сæ æрмæгмæ сын бакæсæм.
Хъарм æмæ электрон тыхимæ зындзинæдтæ æййафын, зæронд кусæнгарзимæ архайын. Уыцы замантæ рохуаты аззадысты. Бæстыхай 60 азы ӕмбӕлгӕ хуызы цалцæг нæ уыд. Федералон программæйы фæрцы ныр уый къухы бафтыд. Сног кæндзысты æддаг бакаст, хъæугæ хызæгтæ баивдзысты.
Материалон-техникон бындур у программæйы æнæмæнг æууæл. Сифтонг ӕй кæндзысты ног техникæйæ; ноутбуктæ æмæ интерактивон фæйнæджытæй. Химийы уроктæ уыдзысты уæлдай цымыдисагдæр. Эксперименттæ араздзысты сæрмагонд партæтыл. Йе ‘нæнинздзинад цудыд кæмæн у, уыцы сывæллæттæн дæр дзы уыдзæн æмбæлгæ уавæртæ.
Алалгиры скъола-интернаты ахуыр кæны 400 сывæллонæй фылдæр. Цырд æмæ змæлаг сабитæн, хъомылгæнджыты ныхæстæм гæсгæ, сног кæндзысты дыууæ спортивон залы. Иуы дзы ныридæгæн рацарæзт цæуы.
Скъолайы ис æртæ корпусы: ахуырадон, хуыссæнуатон æмæ æппæты кæстæр фæлтæрæн. Фæстаг дыууæ корпусы дæр аив кæнынц. Бындуронæй сæм бавналдзысты ног азы. Ныр та уал уагдон æнхъæлмæ кæсы йæ ахуыргæнинæгтæм. Ам ӕппӕты дӕр уырны, ахуыртӕ сывӕллӕтты зӕрдӕмӕ кӕй цӕудзысты, уый.
