Хъармгæнæн сезоны райдианмæ цæттæ кæнынц Цæгат Ирыстоны. Cæрмагонд мадзæлтты фæтк сæххæст кодтой æнæхъæнæй. Республикæйы цæрæнуæтты-коммуналон хæдзарад, артаг æмæ энергетикæйы министрады куыд фехъусын кодтой, афтæмæй фæззыгон-зымæгон рæстæгмæ цæттæ сты 100%-ы.
Бюджетæй куыстытыл схардз кодтой 337 милуан сомы. Уыдон сты коммуналон комплексы организацитӕ, разамындæттæг компанитӕ, цæрæнуæтты æмхæларад, кооперативтæ æмæ бынæттон хиуынаффæйады оргæнты фæрæзтæ. Æппæт 12 хъармдæттæг æмæ хъармхызæг организацийы дӕр райстой акттæ æмæ цæттæдзинады паспорттæ. Афтæ ма 7 муниципалон сконды дæр.
Зæгъын хъæуы уый, ӕмӕ Ӕрдоны æмæ Кировы районтæ уыцы хыгъдмæ кæй нæ хауынц, уымӕн ӕмӕ иугонд сæйраг хъармдæттæг системæйыл нæ архайынц. Мæздæджы район республикæйы районтӕй ӕппӕты фыццаг сцæттæ, адæмы хæдзæрттæ хъарм кӕнын райдыдтой абон. Иннæ районты æмæ Дзæуджыхъæуы фæнд кæнынц хъармгæнæн рæстæгмæ рахизын ног къуырийы. Социалон ахадындзинад цы объекттæн ис, уыдонмæ та хъарм бауадздзысты сæ хицæутты курдиæттæм гæсгæ.
