Цæгат Ирыстоны базарадон-экономикон колледжы минæвæрттæ хуыздæртæ систы студентты “Хсæн æппæтуæрæсеон ерысты”

Базарадон-экономикон колледж раппæлинаг бирæ хъуыддæгтæй у. Æрæджы ахуыргæнæдоны студенттæ архайдтой “Российская студенческая весна” фестивалы Стъараполы. Кæд æмæ бирæйæ нæ уыдысты, уæддæр фылдæр номинациты бацахстой фыццаг бынæттæ. Се ‘хсæн – модæ, вокал æмæ аив дзырд. Æппæты сæйрагдæр æнтыст та Гран-при, уый аккаг систы Гæздæнты авд æфысмæры равдысты тыххæй. Уымæй ссардтой хъæбатырты нæмттæ. Репетицитæ цыдысты уæлдай бæрнонæй, цæмæй аивадуарджыты зæрдæты арф фæд ныууагътаид историйы уæззау мидис. Студентты ма схорзæхджын кодтой “Прорыв года” – йы сгуыхтæй, командæты иумæйаг хыгъды та бацахстой 3-аг бынат. Колледжы директор фæнысан кодта, студенттæ бирæ рæстæг сæхи кæй цæттæ кодтой, уыимæ педагогтæй, афтæ студенттæй дæр у сæрыстыр.