Цæгат Ирыстоны, вакцинаци чи ацыд, уыдоны нымæц зынгæ фæфылдæр. Прививкæ скæнæн ис медицинон уагдæтты. Кусынц мобилон къордтæ. Зæгъæм, Дзæуджыхъæуы цыппæрæм поликлиникæйы сæвзæры рад дæр. Вакцинаци ацæуын кæй фæнды, уыдоны нымæц æрвылбон хæццæ кæны 120 адæймаджы онг. Равзарæн ис цалдæр хуызы препаратӕй иу — «Спутник V», «Спутник Лайт», «КовиВак» æмæ «ЭпиВакКорона».
Инъекци скæныны размæ уал пациентмæ æркæсы терапевт. Вакцинæ ма ‘скӕнынӕн аххосæгтæ куы нæ разыны, уæд адæймаджы арвитынц прививкæмæ. Сертификат кæнæ QR-код райсæн ис æрмæст дыккаг компоненты фæстæ. Ревакцинаци афӕдзы ‘рдæг раздæр кæнын нæ хъæуы. Æдæппæтæй республикæйы COVID-ы ныхмæ иммунизаци ацыдысты 178 мин цæрæгæй фылдæр.
