Спортивон фæзы уавæрæй хъаст кæнынц Ирыстойнаг районы цæрджытæ. Сæ ныхæстæм гæсгæ, йе ‘мбонды иу хай фехæлд, рухс дзы нæй. Сывæллæтæн дзы хъазынмӕ у тæссаг. Объект снывыл кæныны курдиатимæ Дзæуджыхъæуы администрацимæ фæсидтысты Кутузовы номыл уынджы цæрджытæ.
Кутузовы номыл уынджы спортивон фæз уæвгæ ис, фæлæ дзы архайын у тæссаг. Футболон кулдуар æмæ баскетболон уарт сызгæ сты. Йе ‘мбонды иу хай фехæлд, рухс дзы нæй. Уæдæ бырон æмæ авгæй дæр нæ зыны. Æхсæвыгон фæзы æрæмбырд вæййынц хъæргæнаг фæсивæд æмæ фæнуазынц карз нозт. Цæрджытæ сæ зын уавæрæй хъаст кæнынц. Сывæллæттæ кæм хъазой, уый сын нæй.
1980-йæм азты арæзт спортивон фæз заууат уавæры ис ныр 2 азы бæрц. Бынæттон цæрджыты ныхæстæм гæсгæ, 7 азы размæ цалцæггонд уыд, фæлæ кустыты хæрзхъæддхзиныдмæ уыд бирæ фиппаинæгтæ. Ныр адæм æххуысы фæдыл фæсидтысты республикæйы Æхсæнадон палатæмæ. Дзуаппмæ æнхъæлмæ кæсын бирæ нæ бахъуыд. Фарстамæ сæ хъус æрдардтой Дзæуджыхъæуы минæвæртты æмбырды депутаттæ.
Хъуыддаг йæ бынатæй фенкъуысыд Æхсæнадон палатæ æмæ горæты æмархайды руаджы. Нырыккон спортивон фæз саразынæн бюджетæй æхцайы фæрæзтæ дæр рахай кодтой.
Афтæмæй, иннæ аз Кутузовы уынджы фæзындзæн бирæвæрсыг спортивон фæз. Улæфæн рæстæг дзы пайдаимæ æрвитын сæ бон уыдзæн 300 сабийæн.
Дзæдзойты Фатимæ
