Санкт-Петербургы райдыдта 26-æм Æппæтадæмон экономикон форум. Официалон æгъдауæй байгом уыдзæн райсом. Архайы дзы Цæгат Ирыстоны делегаци. Нæ сæрмагонд фæз абон кусын райдыдта.
Цæгат Ирыстон форумы архайджыты размæ рахæсдзæн регионы экономикæйы райрæзты раззагдæр къабæзтæ – промышленность, инвестицитæ, туризм æмæ агропромышленон комплексы гæнæнтæ. Æвдыст æрцæудзæн туристон кластер «Солнечный пояс Алании»-йы проект дæр. Форумы уазджытæ базондзысты, Цæгат Ирыстоны туристон-рекреацион комплекс «Мамысон» кæй аразынц, уый дæр. Ноджы ма – зайæгойты хомагæй сойджын туагады моноглицеридты кондад, информацион технологиты хъæу æмæ Мæздæджы агрокомплексы арæзтады тыххæй.
Мадзалы уыдзæн амалхъомады фарстаты фæдыл æмбырдтæ, федералон æххæстгæнæн оргæнты уæнгтимæ фембæлдтытæ. Боны фæткы – ахсджиаг бадзырдтæ бафыссын дæр. Сергей Меняйло архайдзæн Уæрæсейы субъектты инвестицион уавæры националон рейтингы хатдзæгты презентацийы. Рейтинг æрвылаз бацæттæ кæны æмæ равдисы Стратегион хъæппæристы агентад. Петербургы Æппæтадæмон экономикон форумы ахсджиагдæр цау у, бæстæйы Президент Владимир Путин кæм хъуамæ раныхас кæна, уыцы пленарон æмбырд.
