Ныхасы хъæд, буары змæлд æмæ хиæмбарынад куы фæцудынц, уæд уыдон сты ишемион инсульты фыццаг æууæлтæ. Туг дадзинты куы фæбады, уæд сæрмæ нал фæхæццæ кæны. Тугзилдухаг сæмхæццæ вæйы. Раздæр-иу ацы низ дзæбæх кодтой медикаментты фæрцы. Ныр Цæгат Ирыстоны дохтыртæ кæнынц, æмбал кæмæн нæй, ахæм операци.
Ныр пациентты цард аирвæзын кæны тромбоэкстракция кæй хонынц, уый фæрцы. Специалистты ныхæстæм гæсгæ, операци уæззау нæу. Дохтыртæ агъды сæйраг тугдадзин фæхуынкъ кæнынц, йæ диаметр вæййы з миллиметры онг. Инсультæй кæмæн фæтæрсынц, уыцы рынчынтæн, æнæмæнг, иртæстытæ скæнынц компьютерон томографийыл.
Ныр пациенты уавæр фæхуыздæр. Бадриаты Владимиры ныхæстæм гæсгæ, операцийæ 30 минуты фæстæ йæхи хуыздæр æнкъарын райдыдта. Уымæн æмæ тугзилдухад сног ис. Дадзинтæ ссыгъдæг сты.
Инсультæй кæмæн фæтæрсынц, уыцы пациенты рынчындонмæ афоныл фæхæццæ кæнын. Уæд операци хорз кæй рауайдзæн, уый бæлвырдгонд вæййы. Бæрзонд технологон гæнæнтæй спайда кæнгæйæ медицинон архайд скæнын рынчын куы фæтыхст, уæдæй 6 сахаты æмгъуыдмæ. Дохтыртæ уыцы рæстæг хонынц «Сызгъæрин рæстæг». Туджы къуыбар айсын фæхъæуы, цалынмæ нæ фæхъæбæр вæййы, уæдмæ. Операцийыл æмткæй бахъæуы 15 минутæй сахат æмæ æрдæджы онг.
Сæйраг у 3 операцийы дæр фæткмæ гæсгæ кæй ацыдысты,уый. Ныртæккæ пациенттæ цæуынц реабилитаци, æнхъæлмæ кæсынц хæдзармæ ацæуынмæ. Республикон клиникон рынчындоны ис æппæт хъæугæ фæрæзтæ, цæмæй æвæстиатæй адæймагæн хъæугæ æххуыс бакæной. Туджы къуыбар дадзинтæй айсынæн сæм ис æмбæлгæ кусæнгæрзтæ. Самал сæ кодтой национ проект «Æнæниздзинадхъахъхъæнынад»-мæ гæсгæ.
