Цæгат Ирыстоны коронавирусæй рынчынты нымæц 3 адæймаджы фæфылдæр. Æдæппæтæй ныр сты 8. Республикæйы эпидемиологон центры специалистты иртæстытæ ма рабæрæг кодтой ноджы 3 цауы. Рынчынтæ исынц æмбæлгæ медицинон æххуыс, дохтыртæй сæм лæмбынæг каст цæуы. Рынчынтæм хæстæг чи æмбæлыд , уыдонмæ дæр сæ хъус дарынц. Коронавирус кæм ис, ахæм бæстæтæй чи ссыд æмæ медицинон æркаст кæмæ цæуы, ахæмты нымæц у 700 адæймаджы. Карантинæй кæй систой уыдоны нымæц у 822 адæймаджы. Инфекцийы æмæ вирусы миниуджытæ сæхиуыл не `нкъарынц. Хæдзары лæууыны фæтк æххæст кæнын кæй хъæуы уый фæнсысан кодта парламенты депутат Реуазты Ларисæ дæр. Йæ ныхæстæм гæсгæ инфекци апарахат кæнын ма бауадзынæн, уый уыдзæн æппæты хуыздæр бавæрæн.
Реуазты Ларисæ: «Хъыгагæн, мах, цæрджытæ куыд æмбæлы афтæ нæхи нæ хъахъхъæнæм. Специалистты домæнтæ не `ххæст кæнæм, куыд фæндыйы цæстæй кæсæм уавæрмæ. Карантин æмæ хæдзары бадыны фæтк у æппæты ахадгæдæр профилактикæ. Канд коронавирус нæ, фæлæ цыфæнды инфекцийæн дæр. Æмбарын æй – зын у хæдзары бадын, ахуыр не стæм, фæлæ ахæм рæстæг хъуыды кæнын хъæуы нæ ныййарджыты æнæниздзинадыл. Узæлын хъæуы хистæр кары адæмыл. Уыдонæн коронавирус у æппæты тæссагдæр».
