Цæгат Ирыстоны хицауады сæрдар Дзанайты Барис амыдта ног ахуыры азмæ скъолаты цæттæдзинады фæдыл æмбырд

Цæгат Ирыстоны хицауады сæрдар Дзанайты Барис амыдта ног ахуыры азмæ скъолаты цæттæдзинады фæдыл æмбырд. Архайдтой дзы дзуапдæттæг ведомствоты разамонджытæ, муниципалон скондты æмæ районты администрациты сæргълæуджытæ. Дзанайты Барис куыд загъта, афтæмæй Цæгат Ирыстон æнтыстджынæй архайы “Ахуырады рæзт”-ы паддзахадон программæйы. Уый ‘руаджы 66 скъолайы бындуронæй сцалцæг кодтой. Сног дзы кодтой материалон-техникон базæ. 2024-æм азы та бындуронæй сцалцæг кæндзысты 26 ахуыргæнæндоны. Республикæйы ахуырад æмæ наукæйы министр Алыбегты Эллæ куыд радзырдта, афтæмæй ацы аз национ проект “Ахуырад”-мæ гæсгæ Цæгат Ирыстоны сараздзысты 13 “Рæзты тæлмы”, 2 ног кванториумы æмæ 1 «IT клуб». Уымæй уæлдай ма сентябрæй республикæйы скъоладзаутæ ахуыр кæндзысты æнæпилотон авиацион системæйы куыст. Ацы проекты архайынц 18 скъолайы республикæйы æппæт районтæй. Практикæ та цæудзысты Цæгат Кавказы аграрон-технологон колледжы. Ноджы ма ацы ахуыры аз скусдзысты 11 инженерон æмæ 11 аграрон къласы. Алы муниципалитеты дæр байгом кæндзысты иумæйаг паддзахадон фæлварæнмæ цæттæ кæныны центртæ. Æмткæй райсгæйæ уыдзысты 13. Хъæуты ахуыргæнæндæтты та сног кæндзысты спортивон залтæ. Æппæт скъолатæ дæр æххæстæй сифтонг кæндзысты ног чингуытæй.