Пятигорскы ацыд Æппæтуæрæсеон æвддæсæм турнир фехтованийæ. Снысан æй кодтой спорты æмæ физкультурæйы сгуых кусæг Анатолий Самбуровы номыл. Цæгатирыстойнаг спортсментæ сластой 25 хæрзиуæджы. 15 – сызгъæрин, 5 – æвзист æмæ 5 – бронзæ майданы. Турнир æрæмбырд кодта 380 спортсмены, Уæрæсейы 16 регионæй.
Мыстулаты Маринæ фехтованийæ архайы фæндзæм аз. Алы бон дæр – бæстон тренировкæтæ. Ацы спорты хуыз бауарзта хæрз чысыл ма куы уыд, уæдæй фæстæмæ. Пятигорскы ерысты архайгæйæ, бацахста æртыккаг бынат.
Ацы скъолайы зæрдæргъæвд хъомылгæнинæгтæй ма иу у Токаты Миланæ. Миланæ пъедесталы фыццаг къæпхæнмæ схызт 2008 азы гуырд чызджыты æхсæн. Архайы цыппар азы дæргъы. Нæ басусæг кодта, рагæй олимпаг уæлæхиздзау суæвын æй кæй фæндыд, уый.
Токаты Миланæ, фехтованийы скъолайы хъомылгæнинаг:«Мæн фæнды олимпаг уæлахиздзау суæвын. Æппæт хъарутæй дæр архайдзынæн, цæмæй мæ къухы фылдæр сгуыхтдзинæдтæ бафта, уый тыххæй. Уырны мæ, Ирыстоны кад сæрыстырæй кæй бахъахъхъæндзынæн, уый дæр».
Тренертæ командæйы цæттæдзинадæй разы сты. Уырны сæ, дарддæр дæр сæ хъомылгæнинæгтæ хорз бæрæггæнæнтæ кæй æвдисдзысты, уый. Сæйрагдæр та уæд, æмæ сын хорз фадæттæ куы уа.
Хъесаты Иринæ, Фехтованийы скъолайы директоры хæдивæг: «Пятигорскы нæ спортсментæ сæхи равдыстой иттæг хорзæй. Мах цæмæ æнхъæлмæ кастыстæм, уый нæ къухы бафтыд. Кæд нæ ныхмæлæуджытæ тыхджындæр разындысты, уæддæр уæлахизимæ æрцыдыстæм. Нæ традицитæ хъæздыг кæй сты, уый нæ рох кæнæм. Уæлдай æхсызгондæр та нын у, кæй сæ бахъахъæдтам, уый».
Цæгатирыстойнаг спортсментæм ныридæгæн ис 25 хæрзиуæджы. Уыдонæй – 15 сызгъæрин, 5 æвзист æмæ 5 бронзæ. Дæрддæр æрыгон спортсментæм æнхъæлмæ кæсынц вазыгджын турниртæ. Сæрды архайдзысты Азовы спартакиадæйы, кæронбæттæн ерысты – горæт Кировы, уый фæстæ та Мæскуыйы сæ тыхтæ бафæлвардзысты Уæрæсейы иугонд командæйы хыгъдмæ бахауыны хъуыддаджы.
Айларты Эмилия
