Цæгат Ирыстоны паддзахадон университеты кадджын уавæры байгом кодтой Мæхæмæтты Ахуырбеджы бюст — зынгæ ахуыргонд, педагог æмæ ЦИПУ-йы фыццаг президент. Мадзалы архайдтой республикӕйы сӕргълӕууӕг Сергей Меняйло, университеты разамынды минӕвӕрттӕ, хицауады оргӕнтӕ, ахуыргонды хӕстӕджытӕ, йе ‘мкусджытӕ ӕмӕ студенттӕ. Цыртдзӕвӕн байгом кӕныны бар радтой бинонты уæнг Мæхæмæтты Эдуардæн ӕмӕ скульптурӕйы автор Соскъиты Владимирӕн. Номарæн боны фæлгæты ма уыд тымбыл стъол «Великое служение науке, образованию, народу», зæгъгæ. ЦИПУ-йы Юнеско-йы залы ӕрӕмбырд сты наукон ӕмӕ педагогон ӕхсӕнады минӕвӕрттӕ, культурӕйы архайджытӕ ӕмӕ Мӕхӕмӕтты Ахуырбеджы ӕмкусджытӕ. Конференцийы ӕрныхас кодтой историон наукӕты докторы наукон ӕмӕ педагогон бынтыл, йӕ цардвӕндагыл ӕмӕ, йӕ куысты аргъ цы бындуртæн кодта, уыдоныл.
