Ног азы аргъаумæ æрмæст сабитæ не ‘нхъæлмæ кæсынц. Цæгат Ирыстоны паддзахадон университетæ ууыл дызæрдыг нæ кæнынц. Ныр дзы цыппæрæм хатт сарæзтой армукъа. Фæсивæд сæхæдæг сæ хæдзæртты сцæттæ кæнынц алы адæмыхæттыты хæринæгтæ. Сæ уæййæгтæй цы фæрæзтæ æрæмбырд кæнынц, уыдон раттынц æххуысцух бинонтæн.
Фæсивæдæн ацы мадзал хи ирхæфсыны нысанимæ арæзт нæу. Ныр къуырийæ фылдæр сæхи цæттæ кодтой ацы арфæйаг хъуыддагмæ. Кæфтытæ, зарджытæ æмæ бæркадджын фынгтæ. Фенæн дзы ис алы адæмты хæринæгты хуызтæ. Долма, пылæу, хинкъалитæ æмæ æнæмæнг ирон чъиритæ. Студенттæ нæ бавгъау кодтой сæ хъару æмæ сæ рæстæг, суанг ма сæ æгас бинонтæй дæр цæттæ кодтой хуынтæ. Гуæцæлты Юрийæн æхсызгон у ацы акцийы архайын. Йæхæдæг куыд зæгъы, афтæмæй ахсджиаг у æххуысцух адæмы фармæ балæууын.
Гагулаты Артур хæрзаудæн акцийы ныр цыппæрæм аз архайы. Фыццæгæм курсæй фæстæмæ вæййы раззагдæрты ‘хсæн. Мадзалы ахджиагдзинад æмбары. Фыццаг иу æхцайы фæрæзтæ сæмбырд кодтой æмæ иу ахæм хуызы æххуыс кодтой фæкæсинаг бинонтæн. Фæстæдæр армукъамæ рахызтысты. Алы студент дæр баххæсы йæ æвæрæн.
Ацы аз армукъа ноджы парахатдæр рауад. Архайынц дзы ахуыргæнæндоны иннæ факультеттæ дæр. Фæрæзтæ иууылдæр схардз кæндзысты хæрзаудæн хъуыддæгтыл. Ног азмæ æхсызгон лæвæрттæ скæндзысты, балхæндзысты продукттæ. Æмæ сæ уый фæстæ иумæ байуардзысты æххуысцухтыл. Карджын адæмыл, бирæсывæллонджын бинонтыл. Фæрæзты кæцыдæр хай та арвитдзысты сæрмагонд æфсæддон операцийы бынатмæ нæ æфсæддонтæн æххуысæн.
Ацы хъуыддаг нæ къухы фты нæ деканы фæрцы. Уый тыххæй йын зæгъын стыр бузныг. Студентты хъæппæрисимæ уайтагъд сразы. Ахуыргæнджытæ иууылдæр нæ фарсмæ балæууыдсты æмæ сын бузныг. Æрыгон адæмы сæ хъуыдытимæ иунæгæй нæ ныууагътой.
Ивгъуыд аз студенттæ бахъæлдзæг кодтой 20 бинонты. Куыд раздæр, афтæ та ныр дæр фæсивæд архайынц ног азы къæсæрыл фылдæр адæмæн æхсызгон æнкъарæнтæ балæвар кæныныл. Æвзонг чызджыты æмæ лæппуты уырны – сæ хорздзинад сæм фæстæмæ, кæй здæхдзæн, уый.
