Лæмбынæгæй, алы лыстæгдзинадмæ бæстонæй кæсгæйæ Ренат Дмитриенко лæгъз кæны дзауматæ. Бæлвырддæр дзургæйæ та æцæг хæдтулгæйы хæйттæ. Хорз бæрæггæнæны тыххæй хъæуы бацархайын: ссыгъдæг кæнын гæрзтæ æмæ æрмæст уый фæстæ рахизын фæстаг къæпхæнмæ – ахорынмæ. Елхоты бирæвæрсыг колледжы студент ахуыр кæны программистыл. Фæлæ чемпионат “Профессионалы”- йы архайынмæ равзæрста бынтон æндæр здæхт. Æмæ нæ фæрæдыд — лæппу хæслæвæрд сæххæст кодта иттæг хорз.
Иннæ фæзуаты та лæппутæ æвзарынц хæдтулгæйы уромæн системæ. Къамтæм гæсгæ нæ, фæлæ мæнæ афтæ хи цæстæй уынгæйæ. Ам алцыдæр куыд æцæг æрмадзы, афтæ. Аслан Каслаов ахуыр кæны механикыл æмæ ацы здæхт равзæрста чемпионаты архайынмæ дæр. Хæдтулгæты хъæндзинæдтæ аиуварс кæнæн куыд ис, студент æмбарын кæны æркасты кæстæртæн – республикæйы скъоладзаутæн. Лæппуйы уырны, ахæм фæлтæрддзинад æй фидæны æнæмæнг бахъæудзæн.
Чемпионат “Профессионалы” райдыдта Елхоты бирæвæрсыг колледжы. Байгом дзы кодтой 6 алыхуызон фæзы. Æппæт архайдæн аргъ скодта Сергей Меняйло. Регионы разамонæг бабæрæг кодта æрмадзтæ æмæ аныхас кодта фæсивæдимæ. Сæргълæууæг федта ахуыргæнæндоны уавæртæ, бынаты дзуапдæттæг ведомствæтæн радта амынддзинæдтæ.
Чемпионат “Профессионалы” ацæудзæн æгас республикæйы 17 астæуккаг профессионалон ахуырадон кусæндоны. Студенттæ архайынц 55 алыхуызон компетенции, скъоладзаутæ та 29-ы. Се ‘ппæтæн дæр хорз фадат арæхстдзинад равдисынæн. Уый тыххæй æрмадзты ис хъæугæ кусæнгæрзтæ.
Ерыстæ цæуынц федералон проект “Профессионалитет”-мæ гæсгæ национ проект “Фæсивæд æмæ сывæллæттæ”-йы фæлгæты. Регионалон чемпионат арæзт у дыууæ къæпхæнæй. Студенттæн аргъ кæнынц æрмæст фæлтæрдджын жюри нæ, фæлæ ма фидæны куыстдæтджытæ дæр. Ерыстæ хорз фадат сты фæсивæдæн сæ курдиат раргом кæнынæн. Республикæйæн та – экономикæйы фидæнмæ æвæрæн – кадрты райрæзт.
