Цæгат Ирыстоны сбæрæг кодтой кадджындæр бæрæгбæттæй иу. Хетæджы Къохы бакувыны бар уыд алкæмæн дæр, фæлæ бæрæгбоны агъоммæ ирхæфсæн мадзæлттæ арæзт нæ уыдысты. Уымæн аххосаг у эпидимологон уавæр.
Афтæ Цæгат Ирыстоны бæрæг кæнынц адæмы иумæйаг бæрæгбон. Хетæджы дзуары бон у ирон адæмы æппæты кадджындæр бæрæгбæттæй иу. Æрвылаз тымбыл хъæды дзуармæ адæм æрбахæссынц сæ æртæ чъирийы, æртæ фæрсчы, ирон бæгæны æмæ скувынц Хуыцаумæ.
Цъогойты Тамерлан къохмæ фыццаг хатт æрбацыд фондзаздзыдæй. 69 азы размæ зæдбадæн цы уавæры уыд, уый дæр хъуыды кæны.
Кадджын бæрæгбонмæ бацæуын йæ хæсыл банымадта нæ Республикæйы сæргълæууæг Битарты Вячеслав.
Хетæджы Къохы бакувынмæ æрбацæуы сæдæгай-мингай адæм. Ацы хатт ирхæфсæн мадзæлттæ арæзт нæ уыдысты. Уымæн аххосаг – эпидемиологон уавæр. «Иры Стыр Ныхас»-ы уæнгтæ республикæйы цæрджытæм фæсидтысты, цæмæй бирæгæйттæй ма æмбырд кæной. Адæм цыдысты æмæ куывтой къордгай.
Ацы аз Хетæджы бæрæгбон республикæйы сбæрæг кодтой июлы фыццаг хуыцаубон. Цæмæн афтæ, уый фæбæлвырд кодта Национ ахæстдзинæдты фарстаты министр Цуциты Аслан.
Фынджы уæлхъус ацы хатт бирæгæйттæй не ’рбадтысты. Куырдтой Хуыцауæй сабырдзинад æмæ æнæниздзинад. Куыд раздæр, афтæ ацы хатт дæр æдасдзинадмæ сæ хъус дардтой барадхъахъхъæнджытæ.
Хетаг Плиев
