Парти «Иугонд Уæрæсе»-йы съезды рæстæг нæ бæстæйы президент Владимир Путин рахаста скъолатæ сцалцæг кæныны фæндон. Уый фæдыл арæзт æрцыд сæрмагонд программæ. Йæ фæлгæты бындуронæй сцалцæг кæндзысты Цæгат Ирыстоны скъолаты 70% дæр. Се ‘хсæн Дзæуджыхъæуы 14-æм æмæ 24-æм скъолатæ. Куыстыты æппæт къæпхæнтæм сæ цæст дардзысты кусæг къордтæ. Ныр дæр ахуыргæнæндæтты уавæр бабæрæг кодтой парти «Иугонд Уæрæсе»-йы регионалон æххæстгæнæн комитеты сæрдар Едзойты Марат æмæ Дзæуджыхъæуы администрацийы ахуырады управленийы разамонæг Батырты Аслан.
Къултæ схъуына сты, пъол ранæй-рæтты æмбыд. Ахæм уавæрты Дзæуджыхъæуы 24-æм ис скъолайы ныр цалдӕр азы. Бæстыхайыл цæуы 70 азмæ ‘ввахс. Ахуыргæнæндоны разамонæджы ныхæстæм гæсгæ, фарста алыг кæнæн ис æрмæст бындурон цалцæджы руаджы.
Уæдæ скъолайы æддаг бакаст дæр хуыздæр уавæры нæй. Къулсæрст æркалди æмæ дзы фæзынд фазтæ. Бирæ райхалинаг фарстатæ ис 14-æм скъолайы дæр. Самадтой йæ 1950-æм азты æмæ бындуронæй цалцæггонд никуы уыд. Ныртæккæ дзы ахуыр кæны 500 сывæллонæй фылдæр. Ахуыргæнæндоны сног кæнын хъæуы кълæстæ, актон æмæ спортивон залтæ. Уæдæ хæрæндон дæр
ӕмбӕлгӕ хуызы ифтонггонд нæу.
Дыуæ ахуыргæнæндоны дæр хаст æрцыдысты скъолаты бындурон рацарæзты федералон программæмæ. Дзæуджыхъæуы администрацийы ахуырады управленийы разамонæг Батырты Асланы ныхæстæм гæсгæ, цалынмæ цалцæггæнæн кустытæ цæуой, уæдмæ сывæллæттæ ахуыр кæндзысты хæстæгдæр скъолаты.
Цалцæггæнинаг скъолаты номхыгъд ныртæккæ у цæттæ. Алы бæстыхайы фарстамæ дæр æркæсдзысты сæрмагондæй. Иуты æнæмæнг хъуыддаг у бахъахъхъæнын сæ историон фæлгонц, иннæтæ та хъæуы бæстонæй рацаразын. Парти «Иугонд Уæрæсе»-йы регионалон æххæстгæнæн комитеты разамонæг Едзойты Мараты ныхæстæм гæсгæ, 2026-æм азмæ сног кæндзысты республикæйы скъолаты 70%.
Иннæ аз программæйы фæлгæты Цæгат Ирыстоны фæнд кæнынц 30 скъолайы сцалцæг кæнын.
