Цæгат Ирыстоны скъолаты арæзтад æмæ цалцæг цæуы нысангонд фæткмæ гæсгæ. Бæстæйы экономикон уавæр сыл нæ ахады. Уый тыххæй фехъусын кодта Уæрæсейы вице-премьер Татьяна Голикова. Куыд фæнысан кодта, афтæмæй кусæнгæрзтæ æмæ арæзтадон æрмæгæй бæстæ цух не ‘ййафы. Президент Владимир Путины уынаффæмæ гæсгæ 2025-æм азмæ бæстæйы хъуамæ фæзына 1300 скъолайы.
Цæгат Ирыстоны ацы азы октябрмæ Кæрдзыны сцалцæг кæндзысты скъола. Объект базæронд 70 % онг. Ахуырад æмæ наукæйы министр Алыбегты Эллæ куыд зæгъы, афтæмæй скъола бантыст федералон программæмæ бахæссын. Цалцæггæнæн куыстыты рæстæг райдиан кълæсты скъоладзаутæ ахуыр кæндзысты раздæрау, фæлæ хистæрты та бахъæудзæн иу мæймæ дистанцион ахуыры хуызмæ раивын. Беслæны та байгом ног рæвдауæндон. Бынат дзы ис 230 сабийæн. Сывæллæттæн хъазынæн æмæ фынæй кæнынæн уаттæй уæлдай ма дзы ис хицæн музыкалон æмæ спортивон кабинеттæ, хæрæндон, психолог æмæ логопедæн дæр хицæн уаттæ, стæй медицинон кабинет æмæ административон-хæдзарадон агъуыстытæ.
