Гусалты Зæринæ ацы залмæ æрбацыд хæрз чысылæй, къæсхуыртæ чызджы тренер Золойты Хъазыбег хорз хъуыды кæны. Ныртæккæ та спортсменкæ исы алыхуызон уæзтæ, æмбулы бæрзонд æмвæзадыл ерыстæ. Зæринæ уæззау атлетикæйы йæхи фæлварын райдыдта 11 аздзыдæй. Йæ разамонæг æй уайтагъд бамбæрста чызгæн æнтыстджын фидæн кæй ис, уый.
Æрмæст тырнындзинады ‘руаджы æфтыд чызджы къухы æнтыстдзинæдтæ. Хиуыл кусын, тренеры амынддзинæдтæ æххæст кæнын. Афтæмæй, Зæринæ дыууæ хатты сси Уæрæсейы чемпионкæ. Равдыста хорз бæрæггæнæнтæ — систа 108 æмæ 130 килæ. Куыд нын радзырдта, афтæмæй йæхицæй уый æнхъæл нæ уыд. Спортсментæ сæхи цæттæ кодтой бæстонæй.
Республикæйы уæлахизты æвæрæнтæ фæхъæздыгдæр кодтой Наниты æфсымæртæ дæр. Тимур æмæ Арсен Уæрæсейы чемпионатæй сластой сызгъæрин æмæ æвзист майдантæ. Сæрбæзонд сты сæхицæй. Æмæ куыд нæ? Уæззау атлетикæйы фыдæй-фыртæ архайынц. Уæвгæ, ерыстæм дæр сæхи цæттæ кодтой иумæ.
Тимур залмæ хæрз чысылæй æрбацыд. Кастис иу, йæ фыд штангæ куыд исы, уымæ. Фæндыдис æй йæхи бафæлварын.
Куыд хатдзæг, афтæ Тимур фондз хатты сси Уæрæсейы чемпион. Новосибирскы ерысты æдæппæтæй систа 417 килограммы. Йæ тренер Наниты Руслан йæ ахуыргæнæнинаджы æнтыстдзинæдтæй разы у.
Сæ ныхмæлæууæг райста æртыккаг бынат. Нæ спортсментæ рамбылдтой сызгъæрин æмæ æвзист майдантæ. Ныртæккæ спортсментæ сæхи цæттæ кæнынц ног ерыстæм, разæй сæм æнхъæлмæ кæсы ног уæлахизтæ.
