Фæсивæдон театрты фестиваль «Амыраны рухс» цæуы Цæгат Ирыстоны. Ныр арæзт æрцыд цыппæрæм хатт Республикæйы фæсивæды хъуыддæгты фæдыл комитет æмæ фæсивæдон театр «Амыран»-ы хъæппæрисæй. Архайы дзы 100 адæймагæй фылдæр, ис дзы 20 театралон коллективы бæрц. Цæгат Ирыстоны районты æппæт скъолатæ æмæ культурæйы артдзæстыты архайджытæ сæ арæхстдзинад æвдисынц.
Зассеты Арсен æрыгон архайæг у. «Амыраны рухс»-ы фестивалы архайы дыккаг хатт, номинаци «Драмон спектакль»-ы. Цы роль ын радтой, уый у Хетæгкаты Къостайы «Сидзæргæс»-мæ гæсгæ. Хъазы дзы лæппуйы роль. Куыд зæгъы, афтæмæй йæ зæрдæйы ацы сурæт уæлдай бынат бацахста.
«Сидзæргæс» у Хетæгкаты Къостайы зындгонддæр уацмыстæй иу. Ногиры культурæйы артдзæсты аивадон разамонæг Тыбылты Людмилæ дæр æй дзæгъæлы нæ равзæрста. Йæ æрыгон ахуырдзаутимæ кæны бæстон æмæ ахсджиаг куыст. Мадæлон æвзагмæ сæ æмхиц кæны. Фарон ацы фестивалы бацахстой 3-аг бынат.
Теджетты Виктория æмæ Гуырцъыты Кристинæ та ацы фестивалы архайынц фыццаг хатт. Сæ номинаци – сфæлдыстадон равдыст «Малусæг», архайдтой дзы Коцойты Арсены уацмыс «Дадолты мæт»-мæ гæсгæ, ахъазыдысты дыууæ хойы ролы. Баззад сæм хорз æнкъарæнтæ.
Ацы фестиваль сæрмагондæй арæзт цæуы ирон драматурги æмæ театры бындурæвæрæг Брытъиаты Елбыздыхъойы райгуырæн бонмæ. Архайдта дзы 100 адæймагæй фылдæр, уыдон сты 20 коллективы хибар архайджытæ. Уыдоны ‘хсæн: скъоладзаутæ, студенттæ æмæ æрыгон артисттæ. Архайынц театралон жанры цалдæр номинацийы. Проекты сæйраг нысан та у, цæмæй фæсивæд æмхиц кæной ирон аивадмæ æмæ театрмæ. Уыимæ ма хуыздæр зоной сæ мадæлон æвзаг.
Фæсивæд сæ разамонджытимæ цы равдыстытæ бацæттæ кодтой, уыдон уыдысты æрмæстдæр ирон æвзагыл. Алчи дæр йæ дæсныдзинад æвдыста разæнгардæй. Жюрийы хатдзæгты фæстæ уæлахиздзаутæ сæ курдиат адæмы размæ рахæсдзысты, Дзæужыхъæуы цы гала-концерт арæзт æрцæудзæн, уым.