Цæгат Ирыстоны цæуы фарæстæм æппæтдунеон националон-культурон фестиваль-конкурс «Ирон бæгæны»-йы финал. Мадзалы фæзы сæмбырд сты æвзарæн къæпхæнты уæлахиздзаутæ. Ерыстæ ацыдысты рсепубликæйы районты, Хуссар Ирыстоны, Пятигорск æмæ Краснодары. Ацы аз конкурсы географи фæуæрæхдæр, архайынц дзы Турчы, Канадæйы, Кенийы, Испанийы уыимæ бæстæйы регионты ирон æхсæнæдты минæвæрттæ.
Жюрийы уæнгтæ хуыздæр бæгæныфыцæджы сбæрæг кæндзысты дыууæ номинацимæ гæсгæ — хуыздæр ирон бæгæны æмæ ирон хæринæгтимæ хуыздæр фынг. Уыцы иу рæстæг уазджытæн бацæттæ кодтой хъæздыг æмæ цымыдисаг этнокультурон программæ. Сæ куыстытæ равæрдтой 50 æрмдæсныйы. Æрбацæуджытæ сæхи фæлвæрдтой алыхуызон дæсныйадæвдисæг ахуырты. Бæрæгбон ма саив кодтой концертон программæйæ. Уæ зæрдыл уын æрлæууын кæндзыстæм, æппæтадæмон фестиваль-конкурс «Ирон бæгæны» арæзт цæуы 2010-æм азæй фæстæмæ.
