Хæлардзинады кафт. Иу сценæйыл дыууæ паддзахадон ансамблы «Алан» æмæ «Вайнах». Дыууæ зындгонд коллективы иумæйаг концерт. Аивадуарзджытæ стыр аргъ скодтой сæ курдиатæн. Уымæн æмæ алыхуызон культурæтæ иу сценæйыл кæддæриддæр арф фӕд ныууадзынц зæрдæты. Зындгонд ансамбльты хуыздæр кæфтытæ федтой нæ уацхæсджытæ дæр. Сæ æрмæгмæ бакæсæм.
Чызджыты уæнгты рог змæлд, цæхæрцæст лæппуты къахфындзтыл кафт… Исдуг афтæ фæкæсы адæймагмæ, цыма кæрæдзиимæ кафты æвзагæй сусæг ныхас кæнынц. Ахæм æнкъарæнтæ ӕвзӕрын кæны дыууæ зындгонд ансамбль Алан æмæ Вайнахы концерт.
Цæгат Ирыстоны Адæмон артисты кадджын ном радтой ансамбль «Вайнах»-ы разамонæгæн. Йæ аивадон къорды архайджыты та схорзæхджын кодтой кады гæххæттытæй.
Уазджыты ныхæстæм гæсгæ, Цæгат Ирыстоны цæрджытæн сæ курдиат æхсызгонæй æвдисынц. Аивадуарзджытæ дæр сын ам уæлдай аргъ кæнынц.
Дыууæ ансамблы хæлардзинады концерт фыццаг хатт не скодтой. Æрæджы «Алан» уыд Цæцæны республикæйы. Артистты ныхæстæм гæсгæ, ахæм мадзæлттæ регионты ‘хсæн хæлардзинадæн ахъаз сты. Уымæй уæлдай уæрæх кæнынц сфæлдыстадон гæнæнтæ.
Фидæны ахæм концерттæ фæнд кæнынц арæхдæр кæнын. Афтæмæй ансамбльты æмæ республикæты ‘хсæн хæлардзинад дæр хъæддыхдæр кæндзæн.
