Цæгат Кавказы федералон зылды райрæзты паддзахадон программæ æххæст кæнынæн 2022-æм азы Цæгат Ирыстон райсдзæн 251 млн сомы. Фæрæзтæ снысан кодтой, Дзæуджыхъæуы историон хайы цы хæдзарадон хауæццæгты коллектор ис, уый рацарæзтæн. Уымæй уæлдай, Мæздæджы æртæ донцъирæн куыстуаты арæзтады проектон-хыгъдон документтыл бакусынæн æмæ инвестицион проект «Фундук Алании» сæххæст кæнынæн.
Уый тыххæй Цæгат Кавказы федералон зылды Уæрæсейы президенты æххæстбарджын минæвары цур координацион советы æмбырды фехъусын кодта республикæйы хицауады сæрдар Дзанайты Барис. Видеоконференци амыдта æххæстбарджын минæвары хæдивæг Владимир Надыкто. Ныхас цыд, программæйы руаджы фарон къухы цы бафтыд, ууыл. Бакуыстой Алагиры хауæццæгты сыгъдæггæнæн куыстуæтты арæзтады дыккаг къæпхæны æмæ Алагиры районы хæххон хъæуты дондзæуæн хæтæлты рацарæзты проектон-хыгъдон гæххæттытыл.
Æрдзырдтой фидæны пълæнттыл дæр. Сараздзысты индустриалон парктæ, промышленнон технопарктæ. Горæтты та æххæст кæндзысты экономикон проекттæ. Премьер Дзанайты Барисы ныхæстæм гæсгæ, 2021-æм азы паддзахадон программæйы мадзæлттæн регионы снысан кодтой 676 млн сомы. Уый фæрцы арæзт æрцыдысты социалон инфраструктурæйы объекттæ, проектон-хыгъдон документтæ, царды рауагътой ног инвестицион проекттæ.
