IT-скъолайы ахуырты рæстæг практикон фæлтæрддзинад райсынц нырыккон телекоммуникацион кусæнгæрзтимæ куысты. Уроктæ цæуынц афæдзы æрдæг. Цæгат Кавказы хæххон металлургон институты базонгæ сты æдасдзинады техникæимæ æмæ теорийы бындуртимæ.
Ахуырты пъланмæ ма бахастой информацион æдасдзинад. IT-скъола республикæйы егъау интернет-компанийы байгом кодтой афæдз размæ. Годжыцаты Кристинæ ам архайы дыууæ мæйы, уыцы иу рæстæг ма компанийы фæллой кæны инженерон техникон цæстдарды къабазы. Студенткæ фидарæй зæгъы, цы зонындзинæдтæ райста, уыдон æй æнæмæнг фидæны бахъæудзысты.
Ахуырты фæстæ архайджытæ райсынц паддзахадон сертификат, сæйрагдæр та æмбæлгæ зонындзинæдтæ дарддæр куыстмæ бацæуынæн. IT къабазы æмæ информацион æдасдзинады специалисттæ абон уæлдай хъæугæ сты. Уалыты Артур Цæгат Кавказы хæххон металлургон институт программæ “Прикладная информатика в экономике”-мæ гæсгæ каст фæцис ивгъуыд аз. Ныртæккæ фæллой кæны хызты инженерон мониторингы.
Ивгъуыд аз телекоммуникацион лæггæдты компани æмæ Цæгат Кавказы хæххон металлургон институт бафыстой бадзырд. Ныридæгæн 10 студентæй фылдæр ацыдысты практикæ æмæ куысты нылæууыдысты. Уæлдæр ахуыргæнæндон дарддæр цæттæ кæны хъæугæ специалистты промышленностæн, хъæууон хæдзарадæн æмæ арæзтадон къабазæн. Фондз куыстуаты бындурыл институт байгом кодта йæ кафедрæтæ.
Ахæм æмархайды фæрцы телекоммуникацион компанитæ аиуварс кодтой кадртимæ фарста æмæ байгом кодтой ног гæнæнтæ. Цæгат Кавказы хæххон металлургон институты рауагъдонтæ æхсызгонæй архайынц ноджы егъаудæр проектты.
Металлургтæ, геологтæ, инженертæ æмæ IT- специалисттæ абон хъæугæ дæсныйæдтæ сты. Æрмæст ивгъуыд азы Цæгат Кавказы хæххон металлургон институт куыст ссарынмæ фæкаст 180 студентмæ. Специалистты æхсызгонæй агурынц, бизнесы хъæуынц æвзонг æмæ иттæг хорз цæттæгонд кадртæ. Уый та ууыл дзурæг у, æмæ уæлдæр ахуыргæнæндон пайдайаг æмархайд парахат кæндзæн.
