Мургонд хæххон згъӕлæнтæ сæрмагонд реактивтимæ схæццæ кæн æмæ фæдзадджындæр уыдзысты. Уый хуыйны флотаци. Йæ фæрцы æрзæтæй равзæры сызгъæрины концентрат. Куыд бафты уый къухы? Фыццаг уал згъæрдур доны ныппарынц, дарддæр йæ фæндаг аппаратмæ, йемæ хъæугæ таддзаг, афтæмæй. Фынк пайдаджын хæйттæ уæлæмæ сисы, иннæ минералтæ бæрцуаты быныл баззайынц.
Зынаргъ згъæрты чысыл гуырæнтæ Уæрæсейы ис сæдæйæ фылдæр. Сæ æфтиаг бирæ кæй нæу, уый тыххæй сæ паддзахад нæ пайда кæны. Сызгъæрин гыццыл — йæ фæрæз кæнын та зынаргъ. Афтæ уайы, æмæ хæзнаты мин тоннæйæ фылдæр дзæгъæлы лæууынц. Фæлæ сæ флотацийы ног хуызы фæрцы, гæнæн ис, æмæ пайдайы суадон рауайа. Бакуыстой æмæ йын патент скодтой Цæгат Кавказы хæххон-металлургон институты ахуыргæндтæ. Уыдон раиртæстой, температурæ ивгæйæ газы фазæйыл ахадæн кæй ис, уый.
Флотацийы ног хуызæй уæлдай, Цæгат Кавказы хæххон-металлургон институты æрзæтты кафедрæйы доцент Сергей Евдокимов бакуыста магнит æмæ тæнгъæдты сепарацийыл дæр. Уый фæрцы хъæугæ буаргъæдтæ уæлдæйттæй фæхицæн кæны. Ферромагниты чысыл хæйттæ хъуамæ уой 7-8 нанометры. Абарыны тыххæй, уый дзыккуйæ мин хатты лыстæгдæр у. Буаргъæдтæ хъæугæ асмæ бахæццæ вæййынц сæ химион æмархайды руаджы.
Аслам æмæ хæрзхъæд ферромагнитон тæнгъæды фæрцы бæстæйы æрзæткъахæн къабазæн йæ бон у бæрзонд экономикæйы бæрæггæнæнтæм схизын. Нæ ахуыргæндтæ æмгуыст кæнынц Урал, Сыбыр, Дард Хурæскæсæны сызгъæрин амалгæнæг компанитимæ. Уый нæ республикæйы райрæзтæн хорз гæнæн у. Цинк амал кæныны æвзарæнтæ Цæгат Ирыстоны баззад цалдæр милуан тоннæйы, æмæ уым сызгъæрин æмæ æвзист дæр ис.
Ног амалыл куыст райдыдта 1992 азы. Сергей Евдокимов ыл архайдта дæсгай азтæ æмæ йæ къухы æнтыстдзинад бафтыд. Ныртæккæ та кусы магниты сепарацийыл.
