Уæрæсейы гæрзифтонг тыхты рæнхъыты Цæгат Ирыстонæй балæудзысты минмæ ‘ввахс адæймаджы. Сæ æфсæддон хæс æххæст кæндзысты нæ бæстæйы алы регионты. Дзæуджыхъæуæй кадджын уавæры куыд афæндараст кодтой фыццаг къорд, уый тыххæй нæ дарддæры æрмæджы.
Ацы бон 19 лæппуйæн сæ зæрдæты арф ӕвӕрдӕй баззайдзæн. Тагъд рæстæджы балӕудзысты Уæрæсейы гæрзифтонг тыхты рæнхъыты. Уалдзыгон сидтон компани ахæсдзæн 15-æм июнмæ. Республикæйæ æдæппæтæй æфсадмæ æрвыст æрцæудзысты минмæ ‘ввахс адæймаджы.
Алы æртыккаг лæппу дæр каст фæцис уæлдæр ахуырадон уагдон. Дыууæ сæдæ лæппуйæ фылдæр цæттæ кæнынц ДОСААФ-ы автомобилон скъолаты сæрмагонд дæсныйæдтæм гæсгæ. Уый фæстæ, фæткмæ гæсгæ, æфсæддон хæс æххæст кæнынц Хуссар æфсæддон зылды.
Æфсады службæ кæддæриддæр нымад уыд, æмæ абон дæр у, алы лæгæн дæр йæ хæсыл. Специалистты ныхæстæм гæсгæ, фидæны куыст ссарынмæ дæр у пайда. Къуылымпыдзинæдтыл хъуамæ ма æмбæлой.
Æфсæддон къамисы уæнгтæ барадхъахъхъæнджытимæ иумæ æдзух архайынц, йæхи службæ кæнынæй иуварс чи ласы, уыдонимæ дæр. Ахсджиаг у бахъуыды кæнын, фæткхалджытæ кæй æййафдзысты æфхæрд закъонмæ гæсгæ.
Ирыстонæй сиддонтæ службæ кæндзысты алыхуызон æфсæддон къабæзты. Алкæмæн дæр ис йæхи нысæнттæ.
Бæрнонæй æххæст кæнынц коронавирусы ныхмæ нысангонд мадзæлттæ дæр. Военкоматы кусджытæ се ‘ппæт дæр скодтой вакцинæ. Ног сиддонтæ та æнæмæнг дæттынц ПЦР-тесттæ. Се ‘нæниздзинадмæ бæстон хъусдард цæудзæн дарддæр дæр. Уалдзыгон сиддон компанийы рæстæг нæ бæстæйы æдæппæтæй æфсадмæ ацæудзæн 135 минмæ ввахс адæймаджы.
