Фыццаг фембæлд, нæуæндаг бакаст, æфсарм. Евгений Вахтанговы номыл уырыссаг академион театры чысыл сценæйыл — фыццаг уарт. Æвзонг чызг æмæ лæппу кæрæдзийæн се ‘нкъарæнтæ раргом кодтой. Сæйраг сурæттæ сарæзтой Цæгат Ирыстоны паддзахадон университеты аивæдты факультеты актерты хайады студенттæ. Равдыст фæндаг ссардта театрдзауты зæрдæтæм.
— Кæд нырыккон уацмыс у, уæддæр дзы аивадуарзджытæ разыйæ баззадысты. Уый тыххæй æмæ йæ темæ хæстæг у алкæмæн дæр. Фыццаг уарзондзинад, фембæлдтытæ, æнкъарæнтæ. Ахæм фæлтæрддзинад пайда у куыд дæсны актертæн, афтæ студенттæн дæр. Цыбыр рæстæгмæ ахуыр кæнынц текст, архайынц адæмимæ.
Равдыст сси “Современная драма на сцене. Прогноз на завтра”, зæгъгæ, лабораторийы хай. Дзæуджыхъæуы цæуы 16-æй 23-æм октябры онг. Программæйы — нырыккон пьесæтæ, театралон эскизтæ, дæсныйадæвдисæн ахуыртæ. Æмæ уыдон фадат дæттынц æндæр цæстæй драматургимæ бакæсынæн, аивадуарзджыты сцымыдис кæнынæн ног фæрæзтæ ссарынæн.
— Тынг æхсызгон нын у, раздæры Советон цæдисы тыгъдадæй нæм алыхуызон театры разамонджытæ, директортæ, æмæ режиссертæ кæй æрбацыдысты. Ахæм лабораториты фæрцы не ‘хсæн цы бастдзинæдтæ ис, уыдон фидардæр кæнынц.
Проект æрбангом кодта Уæрæсейы алы регионтæ æмæ хæстæгдæр фæсарæнты театрты минæвæртты. Программæйы архайджытæ зонгæ кæнынц Юрий Поляков, Рагим Мусаев, Елена Обидина æмæ Артем Абросимовы тексттимæ.
— Лабораторитæ арæхдæр вæййынц 2 хуызы — пьесæтæ кæм фæкæсынц æмæ режиссертæ сæ эскизтæ кæм февдисынц. Ам 2 форматы баиу сты. Мæнæн мæ зæрдæмæ тынг фæцыд. Лаборатори уыд тынг цымыдисаг, бирæ æрмæджытæ дзы уыд, бирæ ног пьесæтæм бакастыстæм, кæрæдзийæн нæ фæлтæрддзинадæй фæхай кодтам.
Фæзыл фембæлдысты алыхуызон театралон скъолаты æмæ культурон традициты минæвæрттæ. Ахæм æмгуыстады фæрцы равзæрынц ног хъуыдытæ æмæ цымыдисаг цæстæнгас классикон уацмыстæм.
— Тынг хорз æмгуыстад нын рауад, базонгæ стæм Дзæуджыхъæуы культурæимæ, уыимæ йæ хъæздыг, цымыдисаг театралон цардимæ. Нæ сæйраг нысан у ног авторы ссарын æмæ сæ театрмæ æрбахонын.
Равдысты фæстæ архайджытæ æмæ аивадуарзджытæ уацмысыл ныхас кæнынц, кæрæдзийæн се ‘нкъарæнтæ æргом кæнынц, алкæмæдæр дзы равзæрд цавæрдæр хъуыдытæ сæхæдæг æй куыд равдыстаиккой уый фæдыл. Ахæм æмгуыстад æххуыс у ног цæстæй бакæсын пьесæмæ æмæ фидæны спектакльтæн бындур ссарынæн.
