Хæххон паддзахадон аграрон университеты ахæм хуызы цæттæ кæнынц тауинаг. Пробиркæты картофæн уалдзæгмæ æппындæр ницы уыдзæн. Уæд æй уыдзæн хъæрмуаты ныссадзæн. Халсары бынтæ скæнынц мæнæ ахæм хæрз гыццыл зайæгойтæй. Æфсадынц сæ хъацæнтæй, саразынц сын æмбæлгæ уавæртæ.
Цъыккаты Тамарæ архайы картоф микроклоналон хуызы бирæ кæныныл. Йæ ном йæхи амоны. Лаборант аразы уыцы иу хуызтæ. Афтæмæй тагъд райсы бæрзонд хæрзхъæддзинадимæ æмæ æнæ вирустимæ æрмæг. Аграрон университеты селекцион центры кусынц картофы къуыбæрттимæ. Фитогормонты ‘руаджы сыл уидæгтæ зайын райдайы.
Иу зайæгойæ рауайы æртæ кæнæ фондз быны. Фæлæ сæ мæры садзæн уайтагъд нæ вæййы. Уымæн æмæ сын фитотронон гарзы вæййы иттæг хорз уавæртæ. Уымæ гæсгæ уал картоф фыццаджыдæр бахауы хъæрмуатмæ. Афæдзы фæстæ специалисттæ райсынц тауинаг. Вæййы хæрзхъæд. Быдыры уавæртæн бабыхсы. .
Цъыккаты Тамарæ каст фæцы Цæгат Ирыстоны паддзахадон университеты биологон-технологон факультет. Йæ дæсныйадмæ гæсгæ нæ куыста. Йæхи фæлвæрдта стилистæй. Фæлæ йæ уый фæстæ бамбæрста, æнæ наукæйæ йæ бон цæрын кæй нæу, уый. Йæ уарзондæр бынат сси лаборатори.
Тамарæ ныридæгæн ахуыр кæны агрономийы кафедрæйы аспирантурæйы цыппæрæм курсы. Фидæны аз та хъахъхъæндзæн йæ диссертацион куыст. Лыстæгдзинæдтæ нырма не ‘ргом кæны. Фæлæ фидарæй зоны йæ архайд æнæмæнг пайда кæй уыдзæн нæ республикæйы хъæууон хæдзарады къабазы рæзтæн.
