Хæххон туризм, хъуыдыйы тагъд нымад, риторикæ, ботаникæ — Цыколайы уæлæмхасæн ахуырады центры хи бафæлварыны фадат алкæмæн дæр ис 28 здæхтмæ гæсгæ, компьютеры программæ саразынæй театры ахъазыны онг. Зæгъæм, ам сывæллæттæ ахуыр кæнынц раст ныхас æмæ уæндондзинадыл. Æххуыс сын сты куклатæ. Хи номæй нæ, фæлæ æрхъуыдыгонд фæлгонцты уылты æнцондæр у дзурын.
Малиты Асяйы ахуырты та æрæмбырд кодтой æцæг равдыст. Ис дзы, зæгъæм, космосон ракетæтæ, хæхты массивтæ. Йæхицæн дзы куыст чидæриддæр ссардзæн. Педагог куыд зæгъы, афтæмæй къухвæллой аивады арæнтæ тынг парахат кæны. Гæххæт хуымæтæджы баныхасын нæ, фæлæ сфæлдыстадон дзауматæ саразын, алкæмæн дæр сæ йæхи истори куыд уа, афтæмæй.
Ацы здæхт та ног у — хæххон туризм. Картæ æмæ компас райсгæйæ, фæсивæд ахуыр кæнынц æрдзон ландшафт, Цæгат æмæ Хуссар агурынц, иртасынц Дыгургомы æрдзон хъæздыгдзинæдтæ. Центры директоры ныхасмæ гæсгæ, Æрæфы район хæххон туризмæн хорз у. Дзираты Дамир ам ныридæгæн афæдзы æрдæг архайы æмæ фидарæй йæ бон ранымайын у Рагуырæн зæххы æппæты аивдæр бынæттæ. Йæ фидæн æй фæнды туризмимæ сбæттын, бæллы ма Португали фенын дæр.
Центры ис брейн-рингы иугонд командæ дæр. Фæсивæд æппынæдзух архайынц интеллектуалон хъæзтыты æгас республикæйы. Сæхи цæттæ кæнынц ног ерыстæ суазæг кæнынмæ дæр. Тагъд рæстæджы ацы залы фембæлдзысты Ирыстоны алы районты минæвæрттæ. Центры директор Дзансолты Виталимæ бирæ фæндтæ ис. Хъуамæ здæхтытæ фæфылдæр кæна æмæ сæм фылдæр сывæллæтты æргом раздаха.
Ныртæккæ уæлæмхасæн ахуырады центрмæ цæуы 865 сывæллоны. Уыдон сты куыд Цыколайæ, афтæ хæстæг хъæутæй дæр. куысты сæйраг нысан — алы хъомылгæнинаджы сфæлдыстадон гæнæнтæ дæр базонын æмæ сæ рæзын кæнын. Уымæн æмæ фæсивæдæй аразгæ у сомбон.
