Тюмены мэр Руслан Кухарук æмæ Дзæуджыхъæуы Администрацийы сæргълæууæг Милдзыхты Вячеслав бафыстой дыууæ горæты ‘хсæн æмгуыстады фæдыл бадзырд. Документмæ гæсгæ араздзысты иумæйаг равдыстытæ, форумтæ, ахуырадон, культурон æмæ экономикон мадзæлттæ. Ныридæгæн снысан кодтой фидæны аз Дзæуджыхъæуы бонтæ Тюмены саразын. Сыбирæгтæн фадат уыдзæн нæ истори, культурæ æмæ традицитимæ базонгæ кæнынæн.
Уæ зæрдыл уын æрлæууын кæндзыстæм, ивгъуыд аз Милдзыхты Вячеслав бабæрæг кодта Тюмень сæрмагонд ахуырадон программæйы фæлгæты. Базонгæ ис горæтимæ: базыдта туризмы райрæзты стратеги æмæ мэрийы æмархайд горæты цæрджытимæ. Уæд рахастой уынаффæ Тюмены разамынды командæ йæ сæргъы мэр, афтæмæй Цæгат Ирыстонмæ фæхонын. Мадзалы кæронбæттæн сæргълæуджытæ кæрæдзийæн скодтой лæвæрттæ, Руслан Кухарукы схорзæхджын кодтой «Дзæуджыхъæу – æфсæддон намысы горæт»-ы риуылдаргæ нысанæй.
