Республикæйы коронавирусæй рынчынты нымӕц рæзы. Дыууæ бонмӕ сыл бафтыд 35%. Уый фæдыл Уæрæсейы фæлхасгæнджытæм цæстдарды управленийы специалисттæ бæстондæрæй кæсын райдыдтой, санитарон домæнтæ куыд æххæстгонд цæуынц, уымæ. Ацы хатт сбæлвырд кодтой егъау центрты ирхæфсæн бынӕтты уавæр.
Базарадон центртæм раздæрау бацæуæн ис, QR-код, низæй сдзæбæх уæвыны справкæ кæнæ та ПЦР-тестимæ. Фæлæ сывæллæттимæ ирхфæсæн бынæттæ бабӕрæг кæнын та къухы нæ бафтдзæн æмбæлгæ гæххæттытимæ дæр. Сæрмагонд фæтк æххæст кæнын хъæуы се ‘ппæтæн дæр. Уынаффæ рахастой хицауады уæнгтæ оперативон штабы æмбырды.
Ацы базарадон центры 4 уæладзыджы цъиу змæлæг дæр нæй. Ам дæр æххæстгонд цæуынц низы ныхмæ домæнтæ. Сывæллæтты хъазæн уаты ныр ӕдзух у сабыр. Аттракционтæ нæ кусынц. Администрацийы ныхæстæм гæсгæ, финансон æгъдауæй æфхæрд баййафдзысты, фæлæ сывæллæтты æнæниздзинад сæйрагдæр у. Уыимæ ма ныр низджынты нымæц фылдæр кæны.
Ацы базарадон центры разамынд та сæ ном бахъахъхъæныл æппындæр нæ архайынц. Сæ куыст дарддæр кæнынц, цыма ног фæткæвæрды тыххæй хъусгæ дæр нæ фæкодтой, афтæ. Æрмæст Уæрæсейы фæлхасгæнджытæм цæстдарды управленийы специалистты басгæрсты фæстæ сывæллæтты уайтагъд бæстыхайæ рарвыстой. Рейды хатдзæг — центр сæхгæнын æмæ административон протокол раффысын.
Эпидемиологон домæнтæ хъуамæ æххæст кæной, лæггады къабазы чи архайы, уыдон се ‘ппæт дæр. Уæвгæ, ногæй дзы ницы ис, дарддæр дæр хъæуы социалон дистанци æххæст кæнын, дарын маскæтæ, пайда кæнын дезинфекцигæнæн фæрæзтæй. Уагхалджытæ иваргонд цæудзысты 100 мин сомæй 500 мин сомы онг.
Гæззаты Зæринæ
