Цæгат Ирыстонмæ æрцыдысты Уæрæсейаг эксперттæ. Сæ сæйраг хæс у нæ республикæйы ахуыргæнджыты фæлтæрддзинад фæуæлдæр кæнын. Ног зонындзинæдтæ райсдзысты «Робототехникæ» æмæ «Медиа»-йы дæсныйæдты специалисттæ. Ахуыр сæ кæндзысты 40 ахуыргæнæджы. Кæронбæттæны сæ алчидæр ахуыртæ кæй ацыдысты, уый тыххæй райсдзæн сæрмагонд æвдисæндар.
Трассæйыл раст цыма æцæг дугътæ ис. Робот хъуамæ ацæуа сау хаххыл. Йæ размæ цæлхдуртæ куы фæзына кæна та йæ æрлæууын куы хъæуа, уый тыххæй хъуамæ дзуапп дæтта техникон домæнтæн. Робот хæслæвæрдты йæхи куыд равдисдзæн, уымæн бирæ фиппайнæгтæ ис.
Антон Ермаков, Мæздæджы 8-æм съколайы информатикæйы ахуыргæнæг: «Зындзинæдтимæ дæр сæмбæлдыстæм. Зæгъæм, рухс алы хатт дæр иухызон кæй нæу, уымæ гæсгæ нæ бæрæггæнæнтæ цалдæр хатты сбæлвырд кæнæм. Уымæй уæлдай дзы зынæй ницы ис. Стæй дарддæр дæр практикæйы рæстæг стыр пайды уыдзæнис, уроктæ дæр цымыдисаг дæр уыдзысты сывæллæттæн».
Робототехникæйы курсытæ ахæсдзысты 2 боны. Ахуыргæнджыты фæлтæрддзинадыл бакусынмæ фæхуыдтой сæрмагонд специалисты. Пензæйæ ссыд.
Алексей Кузьмин, Центр «Lego Education»-ы информатикæйы ахуыргæнæг: «Мæ размæ сæвæрдтон хæс ацы ног къабазæй адæмы сцымыдис кæнын. Цæмæй дарддæр дæр республикæйы йæ рæзтыл архайой. Нæ куысты хатдзæгтæй разыйæ баззадтæн. Ныфс мæм ис, ахуырты архайджыты кæй сцымыдис кодтон æмæ дарддæр дæр сывæллæттимæ робототехникæйæ кæй архайдзысты, ууыл».
Ам та цæуынц “Медиа” къабазы ахуыртæ. Кусынц сæрмагонд программæтæ æмæ редактортимæ. Æнтыстдзинæдтæ ныридæгæн сæ къухы бафтыд. Ацы видеоæрмæг ахуырты архайджытæ сарæзтой цалдæр сахаты æмгъуыдмæ.
Нина Логинова- Юнпресс-Пермь-ы директор: «Мах ныртæккæ цæрæм «визуальный век» кæй хонæм ахæм рæстæджы. Адæймаг йæ цæстæй цы уыны, уый у æппæты ахджиагдæр у. Ацы къабазы зонындзинæдтæ кæмæ ис, ахæм адæм дæр нæ къорды ис. Зонынц къамтимæ кусын. Фæлæ, бирæтæн уый ног хъуыддаг у. Фотошоп, зæгъгæ, иу хатт чи байгом кодта, уыдон æй хорз зонынц, зын архайæн дзы кæй у, уый. Уымæ гæсгæ сын æз ныртæккæ æмбарын кæнын, программæимæ кусын афтæ зын кæй нæу. Райдиан къæпхæны зонындзинæдтимæ дæр програмæйы гæнæнтæй бирæтæй сæ бон у спайда кæнын».
Уæлæмхасæн ахуырады кусджытæн курсытæ сарæзта нæ республикæйы дæсныйад уæлдæргæнæн институт. Бацархайын дзы кæй бафæндыд, ахæмтæ бирæ разынд. Сæ нымæц сси 40.
Светалана Макаренко, технопарк «Кванториум»-ы Дзыллон информацион фæрæзтимæ кусæг специалист: «Æмбарæм æй, æртæ-цыппар бонмæ зын кæй у бæстонæй программæ хорз бамбарын кæнын. Фæлæ, уæддæр ахуыргæнджыты ахæм ахуыртæ разæнгард кæнынц дарддæр сæ рæзтыл кусынмæ. Сæ ахуырадон программæ саразыны фаг зонындзинæдтæ сæм фæзынд».
Ахуыртæ сарæзтой технопарк «Кванториум»-ы. Курсытæн дзы ис æппæт хъæугæ кусæнгæрзтæ дæр. Робототехникæйы ахуыртæ кæронмæ æрхæццæ сты. Медиа къабазы архайджытæ та ма абон дæр сæ зонындзинæдтæ уæлдæр кæндзысты. Курсыты кæронбæттæны се’ппæтæн дæр ратдзысты сæрмагонд æвдисæндартæ. Ахуырты руаджы дзы алкæмæдæр фæзынд ног дæсныйад. Уыдзæн сын фадат с зонындзинæдтæ сывæллæттæн дæр бацамонын.
Хуасдзауты Алинæ
