Контролон уадзæн пункт “Уæллаг Ларс”-ы электронон рады цы транзитон уæзласæн хæдтулгæтæ ис, уыдон бæрæггонд цæуынц ацы бынаты. Фæндаггон змæлд аразыны центры специалисттæ иртасынц æппæт информаци. Системæ æххæст кæнын райдыдтой 2,5 азы размæ Сергей Меняйлойы бардзырдмæ гæсгæ. Алцыдæр арæзт у æнцон хуызы. Шофырты фыццаджыдæр сæ фурæ фæхъæуы срегистраци кæнын сæрмагонд пункттæй иуы. Цæмæй уый фæстæ æнæ къуылымпыдзинæдтæй арæны сæрты ахизой.
Суткæйы дæргъы регистрацийы пункттæ кусынц Цæгат Ирыстонмæ бацæуæнты, Кæсæг Балхъар æмæ Мæхъæлы ‘рдыгæй. Ома, уадзæн пункт “Уæллаг Ларс”-мæ фæндагыл. Шофыр бауромы операторимæ сæрмагонд бынаты. Равдисы æвдисæндар, транспортон фæрæзы регистрацийы гæххæт ныууадзы йæ хæтæлы номыр. АФтæмæй йæ бæрæггæнæнтæ вæййынц Центры сайты электронон рады. Шофыры дарддæр фæхъæуы æрмæст бæрæг кæнын йæ рад кæд æрхæццæ уыдзæн, уый.
Шофыртæ фенхъæлмæ кæсынц, цалынмæ хæдтулгæ “Цъæх зонæ”-мæ нæ бахауа, уæдмæ. Æрмæст афтæмæй æмбæлы дарддæр Гуырдзыстоны ‘рдæм арæнмæ цæуын. Уæзласæн хæдтулгæты нымæц æппынæдзух ивы. Æмæ уый специалистты фæндонмæ гæсгæ нæу. Арæх фæндаг æхгæд æрцæуы боныхъæды аххосæй. Гом куы вæййы, уæд кусджытæ ауадзынц 500 уæзласæн хæдтулгæйæ фылдæр. Ахсджиаг у уадзæн пунктмæ 12 сахатмæ бахæццæ уæвын, науæд машинæ радæй сисдзысты. Æнæнхъæлæджы цауы рæстæг та, зæгъæм хæдтулгæйы цалх куы суадза, уæд уый тыххæй фехъусын кæнæн ис центрмæ.
Фæлæ, хатгай, бирæтæ фæндаггон фæткы домæнтæ нæ феххæст кæнынц. Системæмæ гæсгæ рады чи лæууыд, уыцы хæдтулгæты нæ фæуадзынц. Афтæмæй сæвзæры коллапс. Фæткхалджытæ нырма æфхæрд нæ цæуынц. Фарста фехъусын кодтой Сергей Менялойæн. Сæргълæууæг фæсидт транспорты министрадмæ, цæмæй федералон фæндæгтыл уæзласæн хæдтулгæты змæлды фæтк æххæст кæныны бартæ радтой республикæйæн.
Цæгат Ирыстоны фæндæгтыл фæтк куыд æмбæлы афтæ æххæст кæнын у уавæр бæрæггæнæг центры куыст. Специалисттæ бæрнон ведомствæтæм хæццæ кæнынц æппæт къуылымпыдзинæдты тыххæй информаци. Кусджытæ сæ цæст дарынц æхсæнадон транспорты цыдмæ дæр. Ныридæгæн кусынц мобилон уæлæфтуаныл. Уый уыдзæн официалон сайты къопи, фæлæ æнцондæр хуызы. Сервис “Моя улица ” у шофырты хъæппæристæн чиныг.
Мобилон уæлæфтуаны ма уыдзæн базонæн видеоцæстдарды фæрæзтæ кæм æвæрд сты, уый. Цавæр фæткхæлдтытæ бæрæг кæнынц. Хорз ма уыдзæн уымæн, æмæ дзы кæсдзысты маршрутон такси цы æмгъуыдмæ æрбахæццæ уыдзæн æрлæууæнмæ, уый. Хæстæгдæр рæстæг та специалисттæн бантысдзæн светофорты куыст иртасын дæр.
