Ацы къуыри куыд сбæрæг, афтæмæй Хъæбысхæсты дунеон иугонды æххæстгæнæн комитет уæрæсейаг æмæ белоруссаг богæлтты æппæтадæмон ерысты архайын бауагъта, æрмæст Олимпаг комитеты сæрмагонд амынддзинæдтæ хынцгæйæ. Спортсментæ егъау чемпионатты афӕдзӕй фылдæр нæ уыдысты. Уый фæдыл ацы хъусынгæнинагмæ æппæтæй тынгдæр æнхъæлмæ кастысты. Тагъд райдайдзæн Европæйы чемпионат. Нæ фæсивæд æм сæхи куыд цæттæ кæнынц æмæ дзы чи бацархайдзæн?
Хъæбысхæсты академийы сæйраг залы дæсгай богæлттæ – хистæр кары спортсментæ æмæ юниортæ. Райсомы тренировкæйы рæстæг архайын фылдæр хъæуы. Хъæбысæй хæцгæйæ цы амалтæй пайдагонд цæуы, уымæ та бæстон цæстдард ис паддзахадон тренер Тедеты Маликы ‘рдыгæй.
Æппæтадæмон ерысты нæ богæлттæ нæ архайдтой афӕдзӕй фылдæр — Олимпаг комитет сæ аиуварс кодта. Ныр фæсивæдæн ногæй фадат фæзынд егъау аренæтыл сæ хъару æмæ арæхстдзинад равдисынæн. Цалдæр боны размæ Дунейы хъæбысхæсты иугонды æххæстгæнæн комитет рахаста уынаффæ, уæрæсейаг æмæ белоруссаг спортсменты æхсæнадæмон турниртæм бауадзыны тыххæй.
Ерыстæм нæ богæлтты бауагътой, ӕрмӕст Æппæтадæмон олимпаг комитеты сæрмагонд амынддзинæдтæ хынцгæйæ. Уыдонæй иу — æнæ националон тырысайæ архайд.
Уæрæсейы фæсивæдон командæтæ, 15-æй 17 азы онг кæуыл цæуы, уыдон æппæтадæмон ерысты архайдзысты æнæ арæнæвæрдтæй.
Æмæ кæд уавæр кæронмæ бæлвырдгонд нæма у, уæддæр нæ богæлттæн сæ ныфс фæтыхджындæр. Уæвгæ, сæ тренировкæтæ уромгæ дæр никуы бакодтой, фæлæ ахæм дæргъвæтин фæурæды фæстæ Олимпаг бæрзæндтæм схизын зын уыдзæн.
Къуырийы фæстæ Загребы райдайдзæн Европæйы чемпионат уæгъдибар хъæбысхæстæй. Нæ иугонд командæ уыцы ерысты бацархайдзæн æви нæ, уый бæлвырдгонд нæма у, фæлæ фæсивæд сæ тренировкæ иу бон дæр нæ уадзынц. Нæ богæлттæм ныфс ис, æппæт дунейæн та сæ æнæбасæтгæ хъару кæй равдисдзысты.
