Цымыдисаг хъæлæс æмæ æгæрон курдиаты хицау. Мария Калласы зард дисы æфтауы æппæт дунейы аивадуарзджыты дæр. Оперон зарæггæнæг хуымæтæг кумир нæу кæстæртæн дæр. Се сфæлдыстадон райрæзтмæ сын хæссы егъау бавæрд. Аивады легендæйы мысæн изæр ацыд Уырыссаг театры. Бæлвырддæр радзурдзысты ме ‘мкусджытæ.
Йæ курдиат цæсты афтæ ахадыдта, æмæ йæм адæм хъусынæй не ‘фсæстысты. Йæ арæхстдзинад кæддæриддæр стыр дисы æфтыдта. Мария Калласы хъæлæс — æмбал кæмæн нæй, ахæм диссаджы фæзынд. Вокалон аивады легендæ.
Верди, Пуччини, Кармен азæлыдысты Уырыссаг театры. Сценæйыл Хæбæлаты Лали. Ацы концерт ын уæлдай ахсджиаг у. Ирыстоны фыццаг хатт зары. Уæлдай æхсызгон та уый у, æмæ Мария Калласы номарæн мадзалы кæй архайы.
Мариинаг театры симфонион оркестрæн разамынд лæвæрдта Æлбегаты Георгий. Аивадуарзджыты размæ рахастой Мария Калласы репертуарæй аритæ. Концерты бацархайдта Мæскуыйы музыкалон театр «Геликон-опера»-йы солист Константин Бржинский дæр.
Февралы ацы концерт æнтыстджынæй ацыд Мæскуыйы. Йæ аразджытæ йæ фæнд кæнынц æндæр горæтты аивадуарзджытæн равдисын дæр.
