Хæххон Мызуры цæрджытæн 6 азы размæ балæвар кодтой футболон фæз. Фæлæ бынæттон цæрджытæ тыхсынц, сывæллæтты футболæй чи ахуыр кæна, ахæм адæймаг дзы кæй нæй, уымæй. Сæ хъаст Адæмон Фронтмæ бахастой. Уæвгæ, канд футболмæ нæ, фæлæ ма сæ фæндид аив гимнастикæйы къордмæ дæр цæуын. Цæуыл сæ зæрдæ дарынц æмæ сын чи баххуыс кæндзæн? Ууыл ныхас кæнæм «Йæ рæстæгыл».
Æхсæнадон транспорты маршруттæ ивæн нал уыдзæн, цæрджытимæ æнæ аныхасгæнгæйæ! Закъонмæ ахæм ивддзинæдтæ бахæссыны хъæппæрис равдыстой фракци «Новые люди»-йы депутаттæ. Куыд нымайынц, афтæмæй фæстаг рæстæг регионты сарæх сты, муниципалон оргæнтæ æхсæнадон транспорты куыстмæ фылдæр экономикон цæстæй кæй кæсынц, уый æвдисæг цаутæ. Сæ уынаффæтæ арæхдæр адæмы уавæртæн дзуапп нæ фæдæттынц. Нæ республикæйы æхсæнадон транспорты куыстмæ мах ногæй не `ргом аздæхтам.
