Курдиæттæ æркасты бацархайынмæ æрвыстой канд Уæрæсейæ нæ, фæлæ ма суанг хæстæг фæсарæнтæй дæр. Ацы проекты сæйраг хæс у туризмы райрæзт.
Ома, Цæгат Ирыстоны æгæрон туристон гæнæнтæ равдисын. Æркасты хатдзæгтæм гæсгæ рамбылдта Валерия Ковалевская. Студентка цæры Минскы. Йæ видеоæрмæгæй жюрийы уæнгты зæрдæтæ балхæдта. Радзырдта, куыд тынг æй фæнды ирæтты цардыуаг æмæ æгъдæуттимæ базонгæ уæвын, уый тыххæй. Валериямæ æнхъæлмæ кæсы тынг цымыдисаг æмæ хъæздыг программæ. 4 боны арвитдзæн Ирыстоны. Фендзæн Дзæуджыхъæуы боны бæрæгбоны мадзæлттæ, бабæрæг кæндзæн ирон чындзæхсæв, сахуыр уыдзæн, ирон бæгæны куыд фыцгæ у æмæ ирон цыхт куыд ахсгæ у, уыдæттæ. Уæдæ йын нæ хæхбæстæ дæр куыннæ хъуамæ равдисой. Сараздзысты йын экскурси. Нæ каналы разамынд куыд зæгъы, афтæмæй проект «Хочу в Аланию!» арæзт цæудзæн мæй иу хатт.
