Къӕсӕрӕй бакъахдзæфгæнгæйæ дæр бæрæг дары — ам у хӕрзӕфснайд ӕмӕ хъарм. Хъуысы худын, хӕрзад сихор ӕмӕ ногæхсад хуыссӕнгæрзты тӕф. Худӕндзаст сабитӕ тыргъты разгъор-базгъор кӕнынц, хъазынц ӕмӕ сабыр сахаты рӕстӕг адджын фынӕй кӕнынц. Вика Самойлова ардӕм ӕрбацыд, дыууӕ азы йыл куы цыд, уӕд. Ныртӕккӕ йӕхи цӕттӕ кӕны скъоламӕ.
Алы ран дæр алцӕмӕй ӕххӕст фӕтк: хъазӕнтӕ ног не сты, фӕлӕ хӕрззылд, чингуытӕ ныхæст, рудзгуытыл дидинджытӕ. Хъомылгӕнджытӕ сӕттынц: “Ам алы къуым дӕр хи къухӕй конд у, цӕмӕй сывӕллӕттӕн хорз уа”. Фæлæ раст зӕгъын хъӕуы, хи тыхтӕ нӕ фаг кӕнынц. Уӕттӕ хæрзхъарм нæ вӕййынц, дон алы хатт нæ кæлы, цар ӕмӕ къултыл та фазтæ.
Бæстыхай сарӕзтой 1913 азы. Иуӕй-иу ахуыргӕнджытӕ сӕхӕдӕг дӕр цыдысты ацы рæвдауæндонмæ сывӕллӕттӕй. Еленæ ам схъомыл, фӕстӕдӕр та йӕ чызджы æрбакодта. Уымӕн ацы бынат у райгуырӕн хӕдзары хуызӕн. Сылгоймаг кусы 27 азӕй фылдӕр. Йӕ ныхӕстӕм гӕсгӕ, сабидоны бындурон цалцӕг иу хатт дӕр нӕ уыд.
Ацы аз ралӕууыд стыр ивддзинӕдты афон. Сабиты ныридӕгӕн ӕндӕр кусӕндӕттыл байуӕрстой. Æмæ хӕстӕгдӕр рӕстӕг ам райдайдзӕн егъау рацарæзт. Коллективæн райгуырӕн бынатӕй фӕхицӕн зын у, фӕлӕ ногдзинад царды хос у, уый æмбарынц.
Цалцӕгадӕн фадат фӕци национ проект “Бинонтӕ”-йы фӕрцы. Ам аивдзӕн алцыдӕр: бындурӕй уӕлхӕдзары онг. Кусджытӕ сног кæндзысты гӕрзтӕхсӕн, хойраджы блок дæр. Уӕтты сисдзысты зӕронд пъолтæ, сног кӕндзысты цартӕ ӕмӕ къултӕ. Кӕлӕддзаг хæтæлтæ раивдзысты нырыккон системӕтӕй.
Бындурон цалцӕг “Забава”-йæн балӕвар кӕндзӕн дыккаг цард. Ӕмӕ ноггонд рæвдауæндонмæ сывӕллӕтты фыццаг къорд куы ‘рбазгъора, уӕд сыл хъомылгӕнджытӕн сӕ бон уыдзӕн ноджы удӕнцойдӕр уавӕрты аудын.
